Мекенжайы жасырын бар, өткен заманнан сыр шертетін дәмхана, сыра биржасы және Алматының өзге де жаңа орындары

«Щука»

Мекенжайы: Радостовцев к-сі, 333а («4YOU» ТК)

Жоғарғы Mega ауданында тұратындарға аздап қызғаныш бар, себебі дәл мұндағыдай дәмді «селедка под шубой» тағамын тек анаңыздың қолынан ғана дәм тата аласыз. Бұл бистроға кірген бойда отбасылық жылы атмосфера сезіледі. Мұнда қызметкерлердің жұмыс күні зал ортасындағы дөңгелек үстел басында дәм татудан басталады. Жиналыстан кейін бәрі өз ісіне кіріседі. Ас үй мен бар ашық болғандықтан, қонақтар тапсырысының дайындалу барысын тамашалай алады. Кейбір қонақтар өздерін бөтен санамай, отбасының бір мүшесіндей болып кеткен: интерьерге арнайы гүлдер, құмыралар мен кітаптар сыйлап жатады.

«Щука» – кеңес заманына саяхат жасатқандай әсер қалдыратын, славян халықтарының асы мен мәдениетінен сыр шертетін орын. Күндіз 80-ші жылдардағы фильмдердің саундтректері қойылса, кешке Губин, Пресняков, Меладзе әндеріне ауысады. Суретші Айгүл Бейсенованың жұмыстары бұл жерге ерекше колорит береді, дегенмен басты туынды – Шагал картинасына жасалған интерпретация. Онда суретшінің ғашығының орнына қаланың үстінде шортан балығы қалықтап тұр. Дәмі тіл үйіретін, тойымды балықты кезінде патшалар да, қарапайым халық та құрметтеген, сондықтан бистро тұжырымдамасы да осы балықтың айналасында құрылған.

Atelier

Мекенжайы: құпия

Atelier-нің мекенжайы құпия сақталады: оны тек достарыңызға сыбырлап немесе директіге жазып біле аласыз. Көшеден қарағанда кәдімгі бутиктен аумайтын бұл барды бірден табу қиын. Атауы да тегін емес, себебі бұрын бұл жерде шынымен тігін ательесі болған. Оның жұрнақтары дизайннан анық байқалады: қара едендегі ақ сызықтар пішу тақтасын елестетсе, ескі тоқыма үстелі демалыс күндері диджей-сеттерге арналған орынға айналады. Тіпті киім ауыстыратын бөлме де сол күйі сақталған. Оны алдағы уақытта өз мақсатында қолданып, жергілікті брендтердің киімдері мен арнайы мерч сату жоспарда бар. Ал кіреберісте қазірдің өзінде аксессуарлар дүкені жұмыс істеп тұр. Алматының өнерлі ортасы мұнда әңгіме-дүкен құрып, сазды әуен тыңдап, дене сергітіп, әрине, сусын ішу үшін жиналады.

ProCoffee

Мекенжайы: Достық д-лы, 87а

Бұрынғы «Венецияның» орнына ашылған жаңа мекеме бірден көз тартады: ашық қызғылт сары бар, қою жасыл плитка және ауқымды мурал ерекше үйлесім тапқан. Кофехананың бірнеше аймағында жөндеу жұмыстары әлі жалғасып жатыр, мурал да толық аяқталмаған. Онда қолына кесе ұстаған қыз бен ақ қызғалдақтар бейнеленген. Мурал ортасындағы жалғыз қызыл гүл – брендтің отаны Шымкент қаласының символы. Негізін қалаушы Ахан Бекбауов ProCoffee-ді «кофе мейрамханасы» деп атауының өзіндік себебі бар. Мұндағы кеңістік қонақтарға күту аймағы, терраса, негізгі зал, VIP-кабина немесе коворкинг сияқты түрлі орындарға жайғасуға мүмкіндік береді. Фрилансерлер де ар-ұжданын қинамай, жұмыс істейтін орын табылды деуге толық негіз бар.

The Tap

Мекенжайы: Розыбакиев к-сі, 336, 14-блок («Amir» ТК)

The Tap – сыра ішу мәдениетіне жаңаша қарайтын, Алматыдағы тұңғыш сыра биржасы. Ішіне кіргенде, 60-шы жылдардағы Америкаға саяхат жасағандай боласыз. Сыра бағасы құдды бір биржадағы акциялар секілді: сұраныс көбейсе – қымбаттайды, азайса – арзандайды. Сәтін күтсеңіз, бағаның күрт құлдырауына куә болуыңыз мүмкін! Ал өз шегін білетіндерге ерекше мәміле жасауға мүмкіндік бар: барменге қанша саптыаяқ ішетініңді алдын ала айтып, ақысын бірден төлеп қоясың. Сыраңыз сіздің босаған бокалыңызға қарай құйылып отырады.

Wallride Cafe

Мекенжайы: Абай д-лы, 8а

Көпшілік бұл жерді тек скейтбордшыларға арналған деп ойлап, Wallride-қа кіруге жүрексінеді. Алайда бұл үрейдің негізсіз екенін ішке кіргенде бірден түсінесіз: мұнда танысаң да, танымасаң да, бәрін отбасының бір мүшесіндей құшақ жая қарсы алады. Wallride – негізінен Орталық Азиядағы ең ірі скейт-шоп. Дүкеннің жұмыс істеп тұрғанына біраз болса да, жақында оның ішінен шағын кофехана ашылды. Бұл өз кезегінде жаңа адамдардың ортаға сіңісіп кетуіне тамаша мүмкіндік туғызды. Кофехананың шағын мәзірінен дәмді снэктермен қоса, ыстық және салқын сусындарды да табасыз. Мұнда скейтборд тақталары, борд дөңгелектері, киім-кешек пен түрлі басқа аксессуарлардан бөлек скейтбординг мәдениетіне арналған кітаптар мен журналдардың бай топтамасы да жинақталған. Тіпті осы тақырыпқа ден қойғандар үшін арнайы фильм көрсетілімдері мен кештер де ұйымдастырылып тұрады.

Adept

Мекенжайы: Самал-3, 25 («Меркур Тауэрс» ТК)

Бұл – жай ғана ішімдік ішетін орын емес, сусындарды зерттейтін, олардың тарихына үңілетін тұжырымдамалық кеңістік. Ол Champagne мейрамханасының дәл астында орналасқан. Мұндағы қызметкерлер сізге сусынның тарихын баяндап, бар зертханасы мен дәм мен хош иістер кітапханасын қуана көрсетеді. Ішке енгенде қап-қараңғы бөлмеге тап болып, сәл абдырап қалуыңыз мүмкін. Бірақ көзіңіз қараңғыға үйренген сәтте, мұның қаншалықты жайлы әрі тылсым атмосфера екенін сезінесіз. Мұндағы атмосфера биден гөрі ұзаққа созылатын жанды әңгімеге көбірек жетелейді.

Lua

Мекенжайы: Қабанбай батыр к-сі, 96

Таңғы сағат тоғызда Lua-ға бас сұққанымызда, сол маңнан өтіп бара жатқан бір велосипедшінің жайғасып отырғанын көрдік. Кондитерлік студия жақында ашылса да, көпшілікті тартатын орынға айналып үлгеріпті. Негізін қалаушы Алуа Көбегенованың өз ісіне өнер туындысындай қарайтыны бірден байқалады: мұндағы әрбір десерт – көздің жауын алатын жеке бір картина. Мекеменің интерьері де осы ойды жалғастырады: кіреберістегі постерлер, іштегі кілемдер, картиналар мен гүлге толы құмыралар ерекше жайлылық сыйлайды. Десерттердің мол түріне сусындардың да кең таңдауы сай келеді. Олар «матчаның артығы болмайды» деп есептеп, үнемі жаңа үйлесімдерді ойлап табудан жалықпайды. Мұнда «Монополия» ойынына ұқсайтын бір реттік адалдық бағдарламасы да бар: белгілі бір сомаға сауда жасап, «жұмбақ картаға» ие боласыз да, келесі келгенде оны жеңілдік, сусын немесе десерт сияқты сыйлыққа айырбастай аласыз.

Umami

Мекенжайы: Достық д-лы, 91б

Жаздың аптап ыстығында балмұздақтан артық не бар дейсіз? Әсіресе ол Dostyk Plaza-ға жақын орналасқан Umami-дің салқын, табиғи балмұздағы болса... Мекеменің интерьері брендтің өзге орындары сияқты фирмалық пастель түстермен, минималистік талғаммен безендірілген. Бұл жер – отбасымен серуендеуге де, достармен кездесуге де таптырмас орын. Балмұздақ ұнатпайтындар үшін сорбеттердің кең таңдауы бар, әсіресе лимон сорбеті бала кездегі әженің лимон бәлішіндегі джемнің дәмін еске салады. Сондай-ақ Umami-де кофе, просекко, милкшейктер және француз кондитер өнімдері ұсынылады.