Матье Блазидің Chanel үшін жасаған алғашқы топтамасы – сән үйі тарихындағы жаңа кезең
Кеше кешке Гран-Паледе маусымның ең көп күткен көрсетілімдерінің бірі – Матье Блазидің Chanel үшін жасаған дебюттік топтамасының тұсауы кесілді. Он айға созылған дайындықтан кейін дизайнер сән үйінің кодтарына өзіндік жаңа көзқарасын паш еткен болатын. Ол Коко Шанельдің идеяларына сүйеніп, сонымен қатар Габриэль Шанельдің ғашығы – Артур «Бой» Кейпелдің гардеробынан шабыт ала отырып, классикалық рухты сақтап, оған жеңілдік пен заманауи леп қосты.
Дизайнер сән үйінің символына айналған твидті қайта пайымдай отырып, оны салмақсыз дерліктей етіп өзгерткен. Chanel үшін жасалған бұл дебюттік әйелдер топтамасында ол детальдарға – аксессуарларға, көлемді белдемшелерге, қауырсыннан жасалған бас киімдерге және жұқа, мөлдір маталардағы кестелерге ерекше назар аударған.
