Зендаяны медиа кеңістігінде мазақ ету күтпеген жерден басталды. Мамырдың алтысында актриса Met Gala қайырымдылық кешіне ақ смокинг пен Louis Vuitton қалпағын киіп келді. Осы қалпақ 2014 жылдан бері келе жатқан әжуаның жаңа толқынын тудырды. Қызығы сол, «Сегун» сериалында ойнаған Анна Саваи де осыған ұқсас образда болғанымен, ол тек Зендаямен салыстырумен ғана құтылды.

«Zendaya hat theory» (ағыл. «Зендеяның қалпақ теориясы») деген атқа ие болған қауесет 2014 жылы басталды. Ол кезде Disney жұлдызы Teen Vogue шарасына үлкен қара қалпақ киіп келген болатын. Оның суреттері лезде мемге айналып, актриса туралы түрлі сандырақ тұжырымдар тарай бастады. Мысалы, «қалпақ астында оны басқаратын біреу бар», «Зендая – «Бабадук» қорқынышты фильміндегі құбыжықтың тірілген түрі» деген секілді. Шын мәнінде қалпақтың ешқандай зұлымдық мәні жоқ. Теория жақтаушылары жай ғана актрисаны мазақ етіп жүр. Оның сұхбаттарына әртүрлі эффектілер қосып, қалпақты салып, қорқынышты дыбыстармен видеолар жариялап, мимикасын күлкіге айналдырып жатыр. Met Gala-дағы ақ қалпақ жаңа келемежге толы сандықтың бетін ашты. Бұл әрекеттердің тоқтайтын түрі жоқ. Әзілдің астарына үңілгісі келгендерді хейтерлер жаңа қауесеттер қосу арқылы әбден шатастырды. Зендая бұл қудалауға ешқандай пікір білдірген жоқ. Ол шамасы «Одиссея» мен «Эйфория» түсірілімдерімен қарбалас болып немесе әріптесі Том Холландпен алдағы үйлену тойына дайындалып жүрген болар.