Saint Laurent Productions-тың қалай негізі қаланды?

«Ережелерді өзгерту рахат емес пе?» – депті Энтони Ваккарелло кино өндірісіне кірісе бастағанда. Индустрия өкілдері сән әлемі адамының киноға араласуына алғашында күдікпен қараған көрінеді. Энтони ұзақтығы төрт минутқа жетер-жетпес клиптерден бастап, 2019 жылы сценарист Брет Истон Эллиспен (American Psycho-ның авторы) бірге The Arrangement қысқаметражды фильмін түсіреді. Бұл туындыда Эллис пен Ваккарелло махаббат үштағаны тақырыбын бейнелер мен образдар арқылы ашады. Сол жылы Уинг Шья мен Энтони Ваккареллоның A Night in Shanghai клипі шығады. Жобаның бас продюсері – Вонг Карвай. Махаббат үштағаны мұнда да болғанымен, бұл жолы екі кейіпкерді де бір ғана актер ойнады. Бірі – өткен-кеткеннің, екіншісі – қазіргі сәттің бейнесі.

72-ші Халықаралық Канн кинофестивалі аясында Ваккарелло өзінің алғашқы қысқаметражды фильмін ұсынады. Режиссері — Гаспар Ноэ. Lux Æterna («Мәңгілік жарық») кешкі сағат онда көрсетілді. Энтони мұны мансабындағы ең бір есте қаларлық сәттердің бірі деп сипаттайды: «Бала күнімде Канн кинофестивалін анаммен бірге тамашалайтынмын. Кешкі оннан кейін көрсетілетін фильмдер ерекше еді. Қатты қызығатынмын». Lux Æterna да ерекше фильм болды. Фильм туралы түсірілген фильм көрерменді арбап, кино әлемінің жағымсыз жағын бейнелеп, қоғамның «дерттерін» айқындайды.

2020 жылы Saint Laurent Productions Венеция кинофестивалі аясында Абель Феррараның Sportin’ Life фильмін ұсынды. Режиссер фильмде айналасындағы адамдар мен құбылыстар, сондай-ақ COVID-19 пандемиясы салдарынан тұралап қалған өнер саласы жайлы баяндайды. «Saint Laurent Productions студиясын кино өндірушілерге қолдау көрсету үшін аштым. Қаржының тапшылығы кино өндірісіне кері әсерін тигізеді. Режиссерлер өз идеяларынан бас тартуға мәжбүр болып жатады. Өнер мен әсемдік жөнінде еркін ой қозғау мүмкіндігінің болуы – шын бақыт», – дейді Энтони Ваккарелло.

Жаһандық деңгейге шыққан Saint Laurent Productions

2023 жылы компания Жан-Люк Годардың Trailer of the Film That Will Never Exist: Phony Wars атты қысқаметражды деректі фильмін ұсынды. 20 минуттық туынды бельгиялық сюрреалист ақын Шарль Плиснье туралы баяндайды. Картина Годардың соңғы жұмысы болды...

Сол жылы Энтони Ваккарелло Педро Альмодовармен бірге жұмыс істеп, 76-шы Канн кинофестивалі бағдарламасына енген Strange Way of Life фильмін шығарады. Шынайы махаббат туралы жарқын вестерн. Кейіпкерлердің киімдері Saint Laurent мұрағатынан алынған екен. Басты кейіпкердің жасыл күртешесі Энтониге алғашында оғаш көрінгенімен, «ақырғы шешім Алмодавардікі» болған көрінеді. Saint Laurent Productions-ты әлемге осы фильм танытты.

Келесі жылы Канн кинофестиваліне студияның үш бірдей фильмі ілікті: Паоло Соррентиноның Parthenope-cі, Дэвид Кроненбергтің The Shrouds-ы және Жак Одиардың «Эмилия Пересі». Өмірін далаға шашқан сұлу туралы фильм Неаполь көріністерімен ерекшеленеді. Көркемдік тереңдікке жұрдай болып көрінетін картина дін, саясат, гендер және өнер мәселелерін қозғайды. Кроненбергтің туындысы әлі жарық көрген жоқ, биыл жазда шығады. Күнәларынан арылуға бет бұрған наркобаронның хикаясын баяндайтын «Эмилия Перес» картинасы біршама резонанс тудырды. Себебі фильмге түскен актерлердің Мексика тумалары болмаған, ал түсірілім Парижде өткен. Басты рөлді сомдаған Карла София Гасконның бұрынғы мәлімдемелері де дауға қалды. 2021 жылы актриса әлеуметтік желілерде исламофобиялық және нәсілшіл пікірлер жазған көрінеді. Соған қарамастан, «Эмилия Перес» BAFTA-да үздік шетелдік фильм атанды, ал Зои Салдана «Екінші пландағы үздік актриса» номинациясы бойынша «Оскар», BAFTA және SAG Awards сыйлықтарына ие болды. Сондай-ақ фильм «Үздік ән» номинациясы бойынша «Оскар» алды.

Saint Laurent Productions-тың соңғы шыққан туындысы – 2024 жылғы The Passion According to Béatrice фильмі. Режиссер Фабрик Дю Вельц француз актрисасы Беатрис Дальдің Италиядағы сапарын бейнеледі.

Энтони Ваккареллоның жан-жақтылығы көздің жауын алады. Мақсаты – сән және кино тарихында өшпес із қалдыру. Оған бренд логотипін экранға шығарудың қажеті жоқ, себебі титрге енген бір жолдың өзі жеткілікті. Дизайнер өз есімін Канн фестивалінде алғаш көргенде көзіне жас алғанын еске алады. «Saint Laurent дәл осы фильмдер өшпейінше өшпейді, – дейді енді продюсер атанған Энтони Ваккарелло, – алғашында режиссерлер маған күмәндана қарағанымен,  уақыт өте келе менің киноны шынымен де сүйетінімді, одан жарнама жасамайтынымды түсінді». Он фильмнен кейін мүлде күмәнданбайды деп үміттенеміз.