Әрине, біз заманауи той жасағымыз келді, бірақ кавказдық салт-дәстүрлердің лебі есіп тұрды. Шынымды айтсам, менің жақын-жұрағаттарымның келуінің өзі заманауи қадам болды. Өйткені адыгейлерде қалыңдықтың жағын тойға шақыру дәстүрі жоқ. Тек тойға лавашпен жасалатын дәстүрлі рәсімдерді қоспағаныма өкінемін. Он жылдан кейін анттарымызды жаңартқан кезде оларды қосамын.

Біздің тойымыз шағын болды, армян тойларымен салыстырғанда тым қарапайым. Бас-аяғы – 75 адам. Біз адамдардың еркін отыруын қаладық. Күйеуім екеуіміз жақсы уақыт өткізіп, осы сәтті есте сақтап, жақындарымызбен бірге жаңа кезеңді атап өткіміз келді. Тойға дейін тоғыз жыл кездескеніміз ешкімге құпия емес. Сондықтан той жақсы мағынада «пісіп-жетілген» той болды. 

Әркімнің де тойы әдемі, көңілді әрі жүрекке жылы сәттерге толы болғанын қалайтыны ақиқат. Мұндайды алдын ала жоспарлау мүмкін емес шығар, бірақ біздің тойымыз дәл солай өтті. Мәселен, анамның тілек айтқан кездегі көз жасы бейнеге түсіп қалған. Анам осы суреттерді біреудің көргенін қаламай, қатты қысылады. Мен, әрине, ол суреттерді еш жерге жариялаған жоқпын, бірақ олар маған ерекше ыстық.

Тойымыздың маңызды сәттерінің бірі – итіміздің қатысуы. Шайни – отбасымыздың маңызды мүшесі. Біз оның жанымызда болғанын қаласақ та, ең алдымен оның жайлылығын ойладық. Сол күні қарбалас та ыстық болды. Мен онымен өмір бойы бірге жүрсем де, дайындық кезінде оны әурелегім келмеді. Кейін күйеуімнің тойға кешігіп келген туыстары Шайниді алып келді. Осылайша тойымыз дог-френдли болып шықты.

Тойдан есімде қалған ең сүйікті сәтім Стингтің Englishman in New York әнімен байланысты. Біз сахнаның алдында биледік, өзім сүйікті «shine bright» жарқыраған көйлек киіп алғанмын. Оның кристалдарынан шамдардың сары жарығы құбылып жарқырап тұрды. Айналадағы далада тып-тыныш, тек біз ғана осы қараңғы жазықтың ортасында Стингтің әнін шырқап, түн қойнауында нұр шашып тұрдық.

Лиза

Күйеуім екеуіміз Алматыда туып-өскенбіз, сондықтан қаланың қарым-қатынасымызға тигізген әсерін ерекше атап өткіміз келді. Осы себепті тойдың алдындағы түнді «Алматы» қонақ үйінде өткізіп, фотосессияны Қастеев атындағы музейде жасадық. Жан жылытарлық әрі күлкілі love story-ді Калинин және Фурманов көшелерінің қиылысындағы кофеханаларда түсірдік. Жалпы, күйеуім екеуіміз ұзақ уақыт дос болдық, алғашқы кезде ол мені тіпті ұнатпайтын. Өзі жолықтырған қыздардың ішіндегі ең жаманысың дейтін. Қазір болсақ, ақырында соған үйленгеніне күлеміз.

Мен «Театральный» мейрамханасының дәл қарсысында, «Неделька» фонтанының жанындағы үйде туып-өстім. Дәл осы жерде тұрмысқа шығуым символдық мәнге ие болды. Тойдың алдында мейрамханада толықтай жөндеу жұмыстары жүргізіліп, жаңартылғаннан кейін біз алғашқы қонақтар болғанымыз мені қатты қуантты.

Біздің отбасымыз – көпұлтты, біз мұны ерекше атап өтіп, барлық дәстүрлерді сақтағымыз келді. Президиумда орыс, қазақ және неміс тілдерінде «Мен сені сүйемін» деген сөздер ілулі тұрды. Тойға дейін сырға салу рәсімін өткіздік. Бұл – күйеу мен қалыңдықтың туыстары бір-бірімен танысатын ежелгі ырым. Құдалықтың соңында күйеудің жақындары қалыңдыққа сырға салып, екі жақ сыйлықтармен алмасады. Бірақ тойдың өзі заманауи болды, бар болғаны үш тілек айтылды: екі жақтың ата-аналарынан және достардан.

Риза

Жас жұбайларға айтарым, тойға дейін барлық шаруаны алдын ала шешіп алыңдар және би билеуден аулақ болыңдар. Күйеуім екеуіміз кәсіби биші болсақ та, бұл бізге қиынға соқты. Тойда көптеген нөмірлер бимен байланысты болып, шексіз жаттығуға тура келді. Тойдың алдында қонақ үйде демалғымыз келген, бірақ аяғында таңғы төртке дейін би номерін пысықтадық. Күйеуімнің дене қызуы көтеріліп, дәрігер шақыруға мәжбүр болдық. Кейін досымыз келіп, ине салды. Сондағы үш-ақ сағаттық ұйқымен жүрдік.

Айтпақшы, бізде би ғана авторлық болған жоқ. Тойға арналған образдарды дизайнермен бірге ойластырдым. Негізгі бөлім үшін ұзын етекті классикалық көйлек және қозғалу мен билеуге ыңғайлы болу үшін қысқалау басқа көйлектің де болуын қаладым.

Әсіресе тойға дейін love story үшін өзіміз ән шығарғанымызды мақтан тұтамын! Біз ерекшеленіп, мейлінше креатив жасағымыз келді, бірақ, өкінішке қарай, love story таспасы зақымдалып, әнді тек тойдың жалпы жазбасынан ғана сақтап ала алдық. Қатты қайғырмадық, бастысы, біз бұл сәттерді бастан кешіріп, сүйікті адамдарымызбен бөлістік.

Тойды қай жерде өткіземіз деп ұзақ ойландық. Мен Шымкенттенмін, күйеуім Зайсаннан. Туыстарымызды жол жүрумен әурелегіміз келмеді, сондықтан тойды махаббатымыз басталған Алматыда өткіздік. Жақында күйеуім 2015 жылы осында қалай көшіп келгені туралы қызық оқиға айтып берді. Бір мейрамхананың жанынан өтіп бара жатып, ол оған қатты әсер етіп, күйеуім сол жерде үйленуді мақсат етіп қойған. Күйеуім ол кезде қалтасында көк тиыны жоқ студент еді!

Айтпақшы, тойда біздің алғашқы ірі коллаборациямыз жүзеге асты. Тойда түсірілген материалдар көп қаралым жинайтынын біліп, бір пиццерияға ынтымақтастық ұсындық. Сол кезде блогтан алғашқы рет шынымен қомақты ақша таптық. Сондықтан той барлық сұлулығы мен символдығына қарамастан, ақша табуға да мүмкіндік берді.