«Бұл тым артық»: Лина Данэмнің жаңа сериалы махаббатқа деген сенімді қалай қайтарады?

Джесс «тым артық» па?

Біздің редакциядағы үш әйелдің екеуі бұл сериалды соңына дейін көре алмайтынын мойындады. Себебі Меган Сталтер сомдаған кейіпкер олардың жынына тиген. Джесстің мінезі, келбеті, эмоциялары, бәрі «тым артық» көрінеді. Джесстің жасы отыздан асса да, оның мінезі жасөспірімге ұқсайды. Ол өте көп сөйлейді және эмоциясын жасырмайды. Өзін сексуалды әрі тапқыр сезінгенімен, мұнысы көбіне орынсыз болып жатады. Бес минут бұрын танысқан бастығының әйеліне жеке сырын ақтарады. Досының үйлену тойында Феликске секспен айналысуды ұсынады. Ол үнемі басқаларды ыңғайсыз жағдайға қалдыратын сөздер айтады. Бұл кейіпкердің осындай болуы нашар актерлік ойынның кесірі ме, әлде әдейі жасалған образ ба? Бұл сұраққа жауап жоқ. Мүмкін, біз жай ғана біреудің мінсіз болмауын қабылдай алмайтын шығармыз.

Бұрынғы қыз және болашақ қалыңдық

Сериалда Джесстің бұрынғы жігіті Зевпен (Майкл Зеген) қарым-қатынасы психологиялық хоррор сияқты көрсетіледі. Махаббатпен басталған байланыс біртіндеп эмоционалды зорлық-зомбылыққа ұласқан. Жігіт оның музыкалық талғамын мазақтайды, сериалдарға әуестігі үшін ұялтады, сырт келбетін сынайды. Тіпті итінен бас тартуға мәжбүрлейді. Ақырында ол Уэндимен жасырын кездесіп, соған кетіп қалады. Осы қатынастың соңында жарқын және өзіне сенімді Джесс үнемі үрейде жүретін өз көлеңкесіне айналады.

«Сен мені жынды қыласың, – деп жылайды Джесс. – Қасыңда өзімді қаншалықты жалғыз сезінетінімді байқамайсың да. Сен әйелдің жарқын мінезін жақсы көретін еркек болып көрінгің келеді, бірақ шын мәнінде олай емес. Сен мені жұдырықпен емес, махаббатыңның жоқтығымен сындырғың келеді».

Финалда Джесс пен Уэнди ашық сөйлеседі. Осыған дейін біз Уэндиді тек Джесстің көзімен көрдік. Ол «арсыздықпен біреудің жігітін тартып алған» сұлу инфлюенсер болып көрінді. Бірақ кафедегі әңгімеден кейін біз оның да Джесс сияқты ішкі оты сөніп бара жатқан шынайы адам екенін көреміз. Осылайша Лина Данэм көпшілікке таныс жағдайды суреттейді. Ол бойынша ер адам алдымен әйелдің жарқын мінезіне ғашық болады. Ал уақыт өте келе сол үшін оны жек көре бастайды.

Хикая қалай аяқталуы керек еді?

«Бұл тым артық» сериалымен Лина Данэм бізге романтикалық комедияларды қайтарды. Оның сюжеті классикалық желіге құрылған. Джесс Лондонға көшіп, сүйікті ағылшын фильмдерінің кейіпкеріндей өмір сүргісі келеді. Ол бірінші кездескен пабта заманауи Бриджит Джонс сияқты өзінің «мистер Дарсиін» кездестіреді.

Фильмнің соңы да романтикалық комедияларға ұқсайды. Бұл жерде авторлар гендерлік рөлдерді ауыстырып жіберген. Енді Феликске маңызды сөз айту үшін жаңбырға қарамай жүгіріп бара жатқан Джесс болады. Оның бұл әрекетіне Феликс «Маған тұрмысқа шығасың ба?» деп жауап береді.

Көпшіліктің пікірінше, абьюзерден кеткен әйел бірден жаңа қарым-қатынас бастамауы керек. Олар әйел бақытты жалғыздықтан табуы тиіс деп санайды. Сондықтан Джесстің бірден тұрмысқа шығуы көрермендердің ашуын туғызады. Бірақ Лина Данэм оларға былай жауап береді: бұл кейіпкер ешкімге ештеңе қарыз емес.