2025 жылғы интерьердегі трендтер

Минимализм

Минимализмнің «бос кеңістік, қарапайымдық, аз жиһаз» деген қағидасымен қош айтысатын уақыт жетті. Бұл дизайнерлік идеяны енді бір қорап дүниесін құшақтап, пәтерден пәтерге көшіп жүрген студенттерге қалдырайық. Енді байсалды жандарға ғасырлар бойы тамыр жайған әулеттің мекеніндей, тарих пен талғамға толы салмақты үй қажет.

Лофт

Жатын бөлмеңіздегі жерасты тұрағының көрінісі енді ешкімді таң қалдырмайды. Құландының эстетикасы еншісінде қалды, кірпіш пен бетон тіректерді қайтадан сылақпен жабу сәнге айналды. Тіпті кеңселер де әлгіндей «сұлулықтан» арылып жатыр. 2025 жылы лофт стилі тек өзінің түпкі мекені – қоймалар мен фабрикаларға ғана жарасады.

IN

Түс

Өткен жылдан бері «color-drenched interiors», яғни «бояуға малынған бөлмелер» тренді күшейді. «Жарқын бөлме» деген міндетті түрде неон мен түрлі-түсті бояудың жиынтығы деген сөз емес. Негізгі түс ретінде жұмыртқаның сарысы, папоротник немесе кешкі аспан сияқты өзіңізге ұнайтын қанық, бірақ сабырлы реңкті таңдауға болады. Ал лимон немесе алқызыл секілді жарқын екпіндерді жастық, ваза, картина сияқты оңай ауыстыруға болатын бөлшектер арқылы қосқан жөн.

Эклектика

Ешқандай қисын іздеудің қажеті жоқ. Винтажды тоңазытқыш рыцарь сауытымен қатар тұруы мүмкін, ал аттың көне ер-тоқымы заманауи велотренажерді толықтыра алады. Тіпті мысыр сфинксінің басындағы бейсболка да тамаша көрінеді. Егер сіздің интерьеріңіз уақыт саяхатшылары туралы фильмнің дайын декорациясы секілді көрінсе, құттықтаймыз! Сіз 2025 жылдың басты трендін ұстанып келе жатырсыз!

Фитодизайн

Табиғатқа деген құштарлық кейде ақылдың шеңберіне сыймайды. Бұл ой сәнді биофильді дизайнға келгенде айқын көрінеді, себебі бұл тренд иесінен үлкен құрбандықты талап етеді. Мұндай интерьерде қабырғаларды мүк пен қынадан жасалған «тірі» кілеммен көмкереді. Әрине, мұндай тірі панноға үнемі күтім жасап тұру үшін арнайы фитодизайнер жалдауға тура келеді. Ол тіпті ішіндегі ызыңдаған жәндіктерді де қуып отырады. Сонымен қатар бұл стильде табиғи тас элементтері, сылдырап аққан субұрқақтар мен өсімдікке толы құмыралар жиі қолданылады. Тіпті бөлмелерден тікелей табиғатқа шығатын есіктер де жобаланады. Әрине, басыңа құрғақ жапырақ түспейтін қарапайым үйде тұру әлдеқайда оңай. Дегенмен фитодизайнның әдемі, тыныштандыратын әсері бар екені рас. Бірақ өте қымбат әрі машақаты көп екенін ұмытпаған жөн.