Роберт Земекистің аты аңызға айналған «Болашаққа оралу» фильмінде ұшатын көліктер 2015 жылы пайда болатыны туралы болжанған еді. Сол кезеңнен он жыл өткенде, бұл қиял Қытайда шындыққа айналды. Рас, олар кинодағыдай DeLorean болмаса да, сырттай үлкен дронға жалғанған тікұшақ кабинасына көбірек ұқсайды. Мұндай көліктер автономды жолаушылар дроны деп аталады.

2025 жылдың 29 наурызында EHang Holdings және Hefei Hey Airlines компаниялары Қытайда ұшатын көліктерді коммерциялық мақсатта пайдалануға ресми рұқсат алды. Бұл құрылғылар сағатына 130 шақырым жылдамдықпен ұшып, үш мың метрге дейінгі биіктікке көтеріле алады. Әзірге олар қала үстінен шолу экскурсиялары үшін қолданылады. Қытайда төмен биіктіктегі әуе кеңістігі инфрақұрылымын дамыту қызу жүріп жатыр: тікұшақ алаңдарын жаңғырту, әуе қозғалысын басқару жүйесін жетілдіру сынды жұмыстар қарқынды түрде атқарылып келеді.