Сән үйіне көлік саласында жүрген менеджердің неге тартылғаны жайлы айтып береміз
2025 жылғы маусымда Renault компаниясының бас директоры Лука де Мео автосалоннан сән сахнасына бет бұрды: енді ол Gucci, Saint Laurent және Balenciaga брендтері кіретін Kering холдингінің тізгінін ұстайды. Бұл жаңалықты алғаш естігенде таң қалдық. Бірақ екінші мәрте ойлансаңыз, шешім қисынды көрінеді: сән саласында тек әдемі сыртқы пішін емес, ішкі құрылым, яғни бизнес-модель мен басқару тәсілі де аса маңызды. Әсіресе компания тығырыққа тірелгенде, бұдан артық шешім жоқ сияқты.
Бұл – Kering тарихында бірінші рет басқару тізгінін әкеден балаға емес, түйіндеме арқасында беріліп отырған сәт. Бүкіл топтың бұрынғы басшысы, негізін қалаушының ұлы Франсуа-Анри Пино өз орнын күтпеген үміткерге осылай ұсына салды. Бұл таңдау парадокс болып көрінуі мүмкін. Бірақ сән үйінің дағдарысы кезінде көлік саласының менеджері тың серпіліс алып келеді деген үміт те жоқ емес. Oninvest журналисі Петр Кирьян сән үйіндегі монограммалы галстуктерді неге инженерлік мектептің қарапайым жағалары алмастырып жатқанын зерттеді.
Мәселе стильде емес, стратегияда
Kering тобы алғаш рет сырттан топ-менеджерді шақырып, басқаруды соған сеніп тапсырды. Бұған дейін компанияны негізін қалаушының мұрагері Франсуа-Анри Пино басқарған болатын: ол бір мезгілде директорлар кеңесінің төрағасы, бас директор және Пино әулетінің өкілі еді.
Алайда кейінгі жылдар Kering үшін аса табысты бола қоймады. Холдингінің портфелі кең болғанымен, табыстың жартысына жуығын әлі де Gucci қамтамасыз етіп отыр. Ал бұл брендтің де мүмкіндіктері шектеулі екенін пандемиядан кейін бәрі түсінді. Коллекциялар саны қысқарылып, назар жаңа активтерге ауысты. Valentino брендінің 30% үлесін сатып алуы (кейін толық сатып алу құқығымен) туралы ірі мәміле компанияның қарызын өсіріп жіберді: бір жыл ішінде ол 8,5 млрд еуродан 10,5 млрд-қа дейін артты.
2024 жылдың күзіне қарай S&P агенттігі Kering-тің кредиттік рейтингін төмендетіп, BBB+ деңгейіне түсірді. Ал 2025 жылы мамырда Reuters агенттігі сән алпауытын кезекті құлдырау қаупі күтіп тұрғанын хабарлады.
Жаңғырту шебері
Көп жағдайда сән индустриясы мұндай тығырықтан шығу үшін жаңа креативті директорды шақырады. Бірақ бұл жолы Kering шығармашылық емес, басқару қабілеті бар маманды таңдады.
Лука де Мео Volkswagen құрамындағы испандық Seat брендіне жан бітірген менеджер ретінде танымал. Бір кезде «ұстауға обал, тастауға қимайтын» марка саналатын Seat 2015 жылы де Мео басқармаға келгеннен кейін жаңа тыныс алды. Сатылым көлемі 390 мыңнан 574 мыңға дейін өсті. Бұрын тек спорттық моделі ретінде саналатын Cupra жеке брендке айналып, электромобильдермен толықты. Жаңа дизайн мен динамика арқасында Cupra басты брендке айналды. Ақыры сол атау басымдыққа ие болып, 2023 жылы Volkswagen тобы Seat-пен қош айтысты.
Франсуа-Анри Пино | Getty Images
1 / 1
