Baku Fashion Week: Әзербайжанның «бұзылмаған» дарыны мен талғампаздығы

TUVA брендінің парсы миниатюралары бейнеленген матадан тігілген The Quintet топтамасы тіпті асып түсті. Киімнің минималистік пішімі мен қалалық ырғағы оны этно стильге ауып кетуден сақтап қалды. Модельдердің шашы жеті реңкке боялған, бұл да – Низамидің жеті ханшайым мен олардың сарайлары туралы «Хафт Пейкар» поэмасына сілтеме. Әр түс мінез бен тарихты бейнелейді. Орталықта – Ширин мен Лейла, фольклорлық клишелерден ада, жаңаша ойластырылған архетиптік кейіпкерлер. Сабырлы, поэтикалық әрі сәл панк көңіл күйінде ұсынылған.

Dada’s Studio бренді шығыстың әсемдігін ковбойлардың қаһарман рухымен ұштастырды. Дизайнері Наиля Дадашова шығыс эстетикасын батыстың жабайы рухымен теңестіре отырып, Бакудің сән әлемінде кімнің «шерифі» екенін айқын көрсетті. Оның «Wild East» топтамасының атауы – нағыз мәлімдеме. Наиля: «Мен шығыс рухының қаншалықты қайсар әрі жігерлі бола алатынын көрсеткім келді», – деп нық мәлімдеді. Бұл – енді армандағыш шығыс сұлуы емес, жердің нағыз иесіндей бейне.

Көрсетілімдерден байқағанымыз, заманауи әзербайжан әйелі өзіне ерекше назар аударту үшін талғампаздықты ту етеді. Мұны ол Sevdaliza-ның нәзік келбеті мен Hasanovs-тің көздің жауын алатын әшекейлері арқылы асқан шеберлікпен көрсетеді. Әрбір бұйым, әсіресе қылыш-кулондар топтамасы, өзіндік батыл мәлімдеме жасайды. Дизайнердің өзі маған: «Батылдық қажет болғанда тағып жүріңіз» деген еді. Кампайнның жүзі, суретші Элнара Насирли, Әзербайжан халқының бұрын отқа табынған ата-бабалары болғанын еске салды. Бұл – шындыққа жанасатын сөз, өйткені жергілікті әйелдердің бойынан нағыз жалын сезіліп тұр.

Saint Aslan бренді өз топтамасы арқылы нағыз «иістік образды» қалыптастырғандай. Олардың «Caspian Breeze» жинағынан Каспий теңізінің самалы сезіледі. Жеңіл мата, мөлдір қабат, батқан күннің реңктері – осының бәрі сені теңіз жағалауына жетелеп апарады. Бұл көйлектер дәл Main Character Moment (басты кейіпкер сәті) үшін тігілгендей. Сәттің поэзиясы киімнің пішімінде нақты көрініс тапқан.

BFW-да ерекшеленгендер де болды. GUNAH өз көрсетілімін ресми орыннан тыс – өндіріс аймағының бір жерінде өткізді. Қонақтарды бір сағат күттіріп, сосын шоуды айқай-шумен, жеңімпаздарша аяқтады. Олардың «Өмір мен сөз түстері» топтамасы екі мыңыншы жылдардың саундтрегі іспеттес. Дизайнерлер крафт сырасы мен авторлық хот-догі бар тар бардан «неформал» архетиптерді жинаған. Біреудің қолында сымды құлаққабы бар Ipod, екінші модельдің артқы қалтасынан Marlboro қорабы көрініп тұрды (ал қазір кім темекі шегеді?). Бұл олардың трилогиясының екінші бөлімі: біріншісі 1990-шы жылдарды, ал үшіншісі бүгінгі күнді бейнелейді. AirPods Max пен вейптерді келесіде күтеміз!

Заманауи әзербайжандықтардың өзіндік стилі бар ма? Әлбетте, бар! Ол әлі қалыптасу үстінде, дәл осы жердегі сән индустриясы сияқты. Кейде аңғал, кейде қарама-қайшы болса да, жиі өзіндік мінезімен ерекшеленеді. Дәл Fidan Sadig-тің NARRATIVE I топтамасындағыдай. Дизайнер ақ көйлек сияқты қарапайым формаларды алып, оларды нағыз мүсіндік туындыға айналдырды. Детальдардан готикалық сипат, силуэттерден қатаңдық, ал ұсынуда тәсілінен поэзия оқылады. Нәтижесінде тапқыр әрі тұтас дүние шықты.

Baku Fashion Week-тің бар сиқыры осында жатыр. Мұнда сен кім-кім де бола аласың: Шығыстан келген ковбой, шашы түрлі-түсті ханшайым, тіпті қылыш сермеген амазонка. Көрсетілімдердегі образдар этникалық қалыптардың тар шеңберінен шығып, жеке тұлғаның үніне, өзіндік көзқарасына және пішім үйлесіміне ерекше мән береді. Өйткені дизайнерлердің ой-өрісі өткеннің қамалдарын бұзып-жарады.