Люкс сипатына сай маусым: The White Lotus-тың үшінші маусымындағы стиль туралы әңгімелейміз (абай болыңыз, маусымның финалын қоспағанда, мақала спойлерге толы!).
The White Lotus-та міндетті түрде әлдекім қаза табады емес пе? Үшінші маусымдағы атыс кезінде кімнің жолы болмағаны әзірге белгісіз (біздің теориямыз бойынша оны тай маймылдары ұйымдастырды), алайда сериалдағы «астыртын сән-салтанат» енді келмеске кетті. Менмұндалаған байлық оның орнын басты. Логотип те көбейді, байлар да одан әрі жиіркенішті, әрі төзгісіз бола түсті. Олардың гардеробы – Succession сериалынан қалған қарапайым әрі кербез стильге қарама-қарсы дүние. The White Lotus-тың костюм жөніндегі шебері Алекс Бовэрд: «Біздің астыртын сән-салтанатқа қатысымыз жоқ», – дейді. Cartier, Rolex, Valentino және Gucci сынды танымал брендтердің логотиптерінен көз сүрінеді. Мұның бәрі Ко Самуи аралындағы ғажап қонақ үйдің интерьерімен тамаша үйлеседі, өйткені мұнда бір түн түнеудің өзі ондаған мың доллар тұрады.
Алекс Бовэрд алғашқы екі маусым аясында «Эмми» сыйлығына үш рет ұсынылып, оның екеуіне қол жеткізді. Сериалдың табысы арта келе бюджеті де ұлғая түсті. Сол себепті шебер үшінші маусым аясында шын мәнінде көздің жауын алып, кейіпкерлердің байлығын бетке басатын гардероб құрған көрінеді. Бұл жетістік H&M, Zara сынды брендтермен коллаборация жасауға да жол ашты. «Байлар киетін» киімнің «қарапайым халыққа» ұсынылуы – нағыз ирония. Алайда «астыртын сән-салтанаттың ақырын» сәл сапасыздау сипатта көрсету керек деген мақсат болса, мұндағы «жарқыраған» киім үлгілері түпнұсқадан да арзан көрінеді. Керек десеңіз, Gucci мен Valentino «жалған нұсқасын тап» деген ойында оңбай жеңілгендей... Бірақ айтпағымыз бұл емес.
Біз мұнда кейіпкерлердің не кигені және оның себептерін әшкерелеу үшін жиналып отырмыз. Алекс олардың образын одан әрмен келемеждеп, ауқымды люкс сөмкелер топтамасын жинап, Jacquemus-пен бірге вирустық сипатқа ие болған образ жасай алды.
Рэтклиффтер әулеті
«Біз – қарапайым отбасымыз», – дейді әулеттің Ralph Lauren каталогі беттерінен шыққандай әсер қалдыратын анасы Виктория Рэтклифф (Паркер Поузи). Алайда бұл әулет үшін инцест, қаржылық айла-шарғы және лоразепамға деген тәуелділік сынды жайттар – сұмдықтың бер жағы ғана. Алайда қымбат киімнен құралған «қасбет» өз міндетін мінсіз атқарады. Виктория Таиландты менсінбей, өзін оңтүстік аймақтардың ақсүйегі санайды. Ол бірінші эпизод сахнасына Banana Republic көйлегін киіп, жібек шарф тағып, Gucci Bamboo сөмкесін ұстап шығады. Оның екінші сөмкесі – лоразепамды сақтауға арналған винтаж Louis Vuitton.
