Tales & Tellers: Miu Miu-дың Нью-Йорк қаласындағы иммерсивті көрмесінен келген фоторепортаж

Miu Miu-ға тән дауыспен баяндалған әйел болмысы хроникасын өз көзімізбен көріп келдік

Өткен демалыста Нью-Йорк қаласында Miu Miu-дың Tales & Tellers көрмесі өтті. Terminal Warehouse индустриалды кеңістігі қарапайым ғана хикаялардың ордасына айналды. Арасында шыны да, өтірігі де болды. Көрме қараңғы дәлізден, қара блэкаут пердесінен басталады. Қаладан қашып шығып, дүниеге қайта келгендей боласың. Мұндағы модельдер киім ілетін ілгіш емес, олар – өзіндік сюжеті мен мінезі бар кейіпкерлер.

Жоба суретші Гошка Мацуганың күшімен, MACBA директоры Эльвира Дьянгани Осэның қатысуымен және Миуччи Праданың басшылығымен жүзеге асырылған. Түсінген шығарсыздар – іс-шараның әдемі, интеллектуалды әрі сәл де болсын үрейлі болатыны сөзсіз.

Арнайы тілшіміз, фотосуретші София Николева іс-шараның қақ ортасынан, яғни өнер, кино және сән әлемдері әйел туралы жаңа хикаяларды баяндаймыз деп бас қосқан жерден репортаж жасап әкелді.

1 / 2

1 / 1

Мұндағы модельдер тұғырда қақшиып тұрмайды. Олар өмір сүреді. Бірі дертке шалдыққан анасына алаңдайды. Жаны ауырып, түңілсе де, сес бермейді. Басқасы өзінің жаңа дәуірдегі рөлі туралы толғанады. Образдар әйел режиссерлердің фильмдерінен құралған Miu Miu Women’s Tales коллекциясынан шабыт ала отырып әзірленген. Мысалы, Дакота Фэннингтің есею, махаббат және өзінің өмір хроникасы деп алған алғашқы пәтеріне оралуы туралы түсірген Hello Apartment атты қысқаметражды фильмі. Немесе Хайфа Аль-Мансурдың The Wedding Singer’s фильмі – әнші анасының концертін құтқарып, нәзік әрі қыңыр болашақ рухын бейнелейтін Әр-Рияд тумасының хикаясы. Мұнда өткен-кеткен, осы шақ және болашақ endcore-ға, яғни Miu Miu кинематографиялық әлеміне келіп құйылады.

Проекцияларды, костюмдерді, сценарий фрагменттері мен кадрларды көріп, біреудің естеліктерін көріп отырғандай боласың. Естелік болмаса, фемининділікке категория емес, қозғалыс деп қарайтын болашаққа деген үміт.