New Celine: Майкл Райдердің Celine үшін жасаған дебюттік топтамасы

Топтамада бірден көзге түсетін басты деталь – жібек шарфы. Мойынға еркін байланған бұл шарф париждік образдың ажырамас бөлігі саналатындықтан, топтамадағы образдардың жартысында кездеседі. Райдер мұны былай түсіндіреді: «Бұл – балаларға немесе достарға мұра ретінде берілетін зат. Celine үшін шарфтар әрқашан маңызды болған».

Жалпы, топтамада 1970 жылдардағы преппи стилі басым. Кейбір образдарда галстуктың ұшы соңғы сәтте кесіп тастағандай көрінеді. Бұл маусымның міндетті элементіне айналған галстукты салғырт таққан жөн. Оны таққанда сіздің образыңыз емтиханға кешігіп бара жатқан студентті немесе соңғы пойыздан қалып қойған жапондық офис-менеджерді еске салуы тиіс. Топтамада 1980 жылдардың рухы да сезіледі. Мысалы, былғары күртешелерді кигенде, Дэвид Боуидің концертінен енді шыққандай күй кешесіз. Райдер тіпті пальтоның өзін еркін образ жасау үшін белге байлай салған. Осының бәрі жиналып, заманауи париждік Z буынының бейнесін қалыптастырады.

Райдер аксессуарларға келгенде де ештеңені аямаған. Топтамадағы әшекейлердің саны бірнеше сән көрсетіліміне, тіпті бір думанды тойға жететіндей мол. Дизайнер, сондай-ақ, әр саусаққа сақина тағуды, белден тұмарлы тізбектер салбыратуды және беттің жартысын жабатын көзілдірік киюді ұсынады. Ал Celine логотипі бар сақинаны кез келген сәнқой инфлюенсердің армандайтыны сөзсіз.

Дегенмен, топтаманың кемшіліктері де жоқ емес. Ең біріншіден, подиумға логомания қайта оралды. Мысалы, ұсақ Celine жапсырмаларынан тігілген көйлек қызыл кілемнің хитіне айналуы сөзсіз, бірақ сән сарапшылары мұндай шектен тыс логоманияны жақтыра қоймас. Екіншіден, алып логотипі бар биік кеды көзге тым оғаш көрініп, арзанқол танымалдылыққа ұмтылатындай әсер қалдырады. Ал әйгілі Phantom сөмкесіне келсек, Райдер оған күліп тұрған смайликке ұқсайтын орынсыз сыдырма қосып, көлемін жол сөмкесіндей үлкейтіп жіберген.