Cartier әйгілі Grain de Café топтамасын қайта ұсынбақ. Бұл жолы ол жаңа дизайнымен және бұрынғыдан да айқын стилімен ерекшеленеді. Брендтің әйгілі алтыннан жасалған кофе дәнектері заман рухына сай қайта түлеп,  жаңғыртылды: енді олар қозғалмалы бөлшектермен, ақ алтынмен, гауһар тастармен және сан алуан күрделі фактуралармен байытылған. Қозғалмалы моншақтары бар алқа, құпия бекіткіштері бар білезіктер мен 1950-ші жылдардағы сәнді италиялық әйелдердің сырғаларындай шеңбер тәрізді әсем әшекейлер енді жаңа ырғақ пен заманауи келбетке ие болмақ.

Зергерлер 120 сағаттан астам уақыт жұмсаған алқа мойныңызда өзінше бір өмір сүретіндей. 179 гауһар тасы бар жасырын топсалы білезік – құрылымы күрделі болғанымен, білекте өте жеңіл әрі қарапайым көрінеді. Жүзіктер ретро мен қазіргі заманның арасындағы үйлесімділікті танытады. Топтамада классикалық стильге құрмет ретінде жасалған, бірақ көлемді және жұмсақ қозғалғыштығымен ерекшеленетін танамоншақ та бар.

Grain de Café – қолыңызға алып, нәзіктігін сезіп, ұрпақтан-ұрпаққа мұра еткіңіз келетін әшекейлер. Cartier тіпті кофе дәнінің өзін ғажайып бұйымға айналдырудың жолын біледі.