Zenith-те Лоранс «мұра бөліміне» жауапты. Көптеген сағат брендтерінде осындай бөлім бар, бірақ Лоранс үшін бұл тек көркем мәтін жазу емес, нағыз зерттеу жұмысындай. Оның айтуынша, дерек төрт бағыттан алынады: «(1) Тарихи сағаттар – техникалық құрылым, дәуірге сай мүмкіндіктер, стилистика және символика; (2) Құжаттық архивтер; (3) Адамдар, әсіресе замандастардың естелігі ерекше маңызды. Архив үнсіз, куәгер естелігі – тірі дерек; (4) Zenith ғимараттарының өзі –әлі күнге дейін аман сақталып тұрған және ХХ ғасыр сәулет ескерткіші ретінде танылған 18 корпусында әлі талай сыр барына сенімдімін». 

Біз Лоранстан «Неге мерейтойға арналған сағат үш тілімен шектелген? Неге турбийон немесе репетир емес?» – деп сұрағанымызда: «Қарапайым сағат жасау – ең күрделі іс, – деді ол, – үш тілден артық ештеңе керек емес. Қараңызшы, осы қарапайым сағат қаншама мағлұмат бере алады!..»

Лазурит – жұлдызды ұнтақтары бар тас, Zenith логотипіндегі жұлдызды һәм тұсбағдар болған Темірқазықты меңзейді. Көкшіл реңкті секундтық шеңбер – әйгілі El Primero механизміне сілтеме. «Ал 135 атауын жіліктеп көрсек, ол 13 линия (ред. 1 линия = 2,2558 мм) диаметрді, 5 мм биіктікті көрсетеді. Бұл – нақты техникалық сипаттама. Жарнамалық атау емес. Тура үш линиялы винтовка сияқты», – дейді Лоранс.

Баланс дөңгелегінің диаметрі механизмнің үштен бір бөлігін алады. Бұл – дәлдіктің кепілі. Бірінші дүниежүзілік соғыстан кейін сағаттардың кіші корпусы оларға дәлділікті арттыру үшін қажетті механизмге тар болды. Ал 135-тің жайы басқа: калибрі кішкене болғанымен, баланс дөңгелегі үлкен болды және тағы бір артықшылығы – Бреге спиралі. Сыртқы ұшы жоғары қарай иілген сипаты жүрістің бірқалыпты болуына кепілдік береді.

«Мен Эфрем Жобенмен Le Locle музейінде бірге жұмыс істедім, — дейді Лоранс, — ол өз ісіне адал, мінсіздікке ұмтылған адам болатын. Сондай тұлғалар ғана осындай керемет механизм жасай алады».

Лоранс тағы бір құпияны бөлісті. Үш жыл бұрын мануфактура мұражайдағы 12 механизмді әйгілі сағат шебері Кари Вутилайненге беріп, ерекше топтама жасауын сұраған. «Бұлар жай ескі калибрлер емес, нақты дәлдік байқауларына қатысқан үлгілер еді. Олар корпуссыз болатын, жарысқа шыны қаптамада жіберілетін. Механизмдерінде жүрісті басқаратын ерекше тетік болған. Ал 135 калибрінің сатылымдағы түрінде сағатшының қолын қажет етпейтін, 1903–1904 жылдары патенттелген жеңілдетілген реттегіш қолданылатын. Байқау үлгілері – 135-O, өте дәл реттеуді талап ететін, сондықтан оны тәжірибелі шебер ғана істей алатын. Сол кезде біз олардың өлшемін 3D модельге көшіру үшін көп күш салдық, жаңа технологиялар ескі сызбаларға жарамай қалды. Барлық жобалау жұмысы Zenith ішінде жүрді, ал соңғы өңдеу мен циферблаттарды Кари Вутилайненнің шеберханасы жасады. Егер бұл жұмыс істелмегенде, G.F.J. сағаттарын шығара алмас едік. Енді 135 калибрі цифрлық түрге көшіріліп, Zenith-тің қазіргі механизмдерінің қатарына қосылды».

Лоранс лазурит циферблатын айнала қоршаған өрнекті шеңберге назар аударады: онда Zenith ғимараттарындағы кірпіш өрнегі бейнеленген. Кірпіш пен сағаттың не қатысы бар? «Бәрі анық, – дейді Лоранс, – Жорж-Фавр Жако сағаттарын жұрт ұната бастағанда, оған көп сағат жасау керек болды. Ол ешкімге тәуелді болмау үшін кірпіш зауытын өзі салып алды. Сол арқылы әр детальды өзі бақылап отырды. Осылайша, 1865 пен 1905 жылдар аралығында 18 ғимарат салынды. Сол үшін де мерейтойлық сағаттар Zenith-тің өз кірпішінен қаланғанын еске салады».