Соңғы кездері «Оземпик» препараты тек медицина мен денсаулық саласында ғана емес, сонымен қатар мәдениет пен сән әлемінде де жиі талқыланады. Онымен қалай арықтайды?
Жер шарында семіздіктен зардап шегетін 900 миллионға жуық адам бар. Дүниежүзілік денсаулық сақтау ұйымы біздің заманымызды «метаболикалық пандемия дәуірі» деп атауды ұсынып отыр. Үрей тудырғанды жақсы көретіндер мұның бәріне нашар экология мен зиянды тамақтану себеп деп шулап жатыр, бірақ шын мәнінде біз тамақтану жағынан бәрі керемет екенін, мәселе осы астың молдығынан туындап отырғанын іштей сеземіз.
Азық-түлік ешқашан дәл қазіргідей қолжетімді болған емес. Кезінде байлардың соры болған толықтық, енді табысы төмен адамдардың қасіретіне айналды. Себебі ақшаң болса, артық салмақпен күресудің амалын табуға болады: жеке жаттықтырушы, қамқор диетолог, қымбат әрі сапалы препараттар дегендей. Мысалы, төңкеріс жасаған «Оземпик» препараты бастапқыда көпшіліктің қалтасы көтермейтін дүние еді. Препараттың бағасы түсіп, нарыққа оның жаңа, арзанырақ нұсқалары шығып жатса да, қоғамдық пікірде «Оземпик» байларға, Голливуд жұлдыздарына арналған, сондықтан да сиқырлы әрі аз-кем күнәһар нәрсе болып қалыптасты. Әдетте жаңалықтың қаймағын алдымен жұлдыздар мен элита қалқиды. Бұл сәтті трендтің де алғашқы «дәмін татқандар» солар болды. Дегенмен, оның да өзіндік жағымсыз тұстары жоқ емес.
Оземпик деген не?
Оны даниялық Novo Nordisk фармкомпаниясы шығарған. Ozempic – сауда маркасы, ал белсенді заты семаглутид деп аталады, 2018 жылы нарыққа шықты. Бастапқыда семаглутид II типті қант диабеті мен оған ілеспе семіздікті емдеу үшін әзірленген. Оның міндеті – ұйқы безіндегі инсулиннің бөлінуін ынталандыру және тәбетті төмендету. Дәл осы Novo Nordisk компаниясы «Оземпикке» ұқсас, бар болғаны дозаның мөлшерімен ерекшеленетін Wegovy препаратын да шығарады. Сондай-ақ «Оземпиктің» аналогі Mounjaro препараты және әр елде өз атауымен шығатын семаглутидтің бірнеше түрі бар. Мысалы, санкциялардан кейін көптеген келісімдерден шыққан Ресей семаглутидті «Семавик», «Квинсента» және «Инсудайв» деген атаулармен шығара бастады.
Сұхбат берушілер есімдерінің жасырын болуын өтінді
Әсел, 42 жаста
«Ең бастысы – қандай мәселелер туындауы мүмкін екенін алдын ала түсініп, соған дайын болу керек. Бетім «салбырап» кетпеу үшін косметологіммен бірлесе жұмыс істеп, барлық процедураны алдын ала жоспарлап қойдық. Тамақ ішкің келмесе де, ішу керек (шынымен де тәбет мүлде болмайды). Өзіңе әртүрлі мәзір құрастырасың, мен күнделікті дайын, калориясы аз, бірақ пайдалы тағамдарға тапсырыс беріп отырдым. Асықпай, айына үш келіден артық тастамауға тырыстым. Бір жарым келі болса да жақсы, рекорд қуалаған жоқпыз. Бір жылдан кейін инъекциядан бас тарттым, содан бері жеті ай өтті, салмағым бірқалыпты».
Мария (есімі өзгертілген), 40 жаста
«Күйеуім 53 жаста, толықтау еді. Жарты жылда 120 келіден 80-ге дейін қатты арықтады. Ол өте бірбеткей, сондықтан мүлде тамақ ішпей, күніне он шақырым жаяу жүретін. Нәтижесі мені шошытты: дені сау, жас көрінетін жігіт ағасы бір демде шалға айналды. Ақ шашы көбейіп, беті салбырап, әжім басып кетті. Ал іші салбыраған қапшыққа ұқсап қалды, күйеуім футболка кигенде бұл тері «алжапқышты» байқамайды. Түрі сұмдық көрінеді, бірақ мен оны сұлулығы үшін жақсы көрмеймін, сондықтан үндемеймін. Ал төсек қатынасы туралы айтқым да келмейді...»
Лаура, 32 жаста
«Жел! Жан-жақтан шығады! Төменнен шыққан жел былай тұрсын, кекірікті мүлде тежей алмайсың, кенеттен, қатты шығады. Бір-екі рет мейрамханада арыстанша ақырғанымда, көрші үстелдегілер зообақтағыдай жалт қарады. Бағыма орай, қасымда отырғандар құрбыларым еді, олар ондай ұсақ-түйекке мән бермейді. Бірақ нәтижесі керемет – жарты жылда 52-ші... несін жасырайын, 54-ші өлшемнен 48-шіге ауыстым. Осындай нәтиже үшін масқара болуға да болады».
