J.KIM көрсетілімінде шай мен тәшкенттік тәттілерге толы нағыз дастархан жайылды
«Кел, шәй ішейік», – дейтін апам үйдегі бар тәттісін дастарханға қойып. Мен үшін бұл жай ғана естелік емес, балалық шақтан келе жатқан, жүректің түкпірінде сақталған жылы сезім. Дәл осы ана мейірімі мен үй жылулығын дизайнер Женя Ким алғаш рет ана атанғаннан кейін, өзінің Quroq (каз. – «құрақ») атты көктем-жаз 2026 топтамасында қайта жаңғыртты. Орталық Мемлекеттік музейде өткен көрсетілімнің ортасында жеті метрлік үстел – ең жақын адамдар жиналатын отбасы символы тұрды.
Отбасы – J.KIM үшін нағыз құндылық. Модельдер арасында брендтің достары мен тұрақты клиенттері де жүрді, оларды тіпті «туыстар» деуге де болады. Олардың қатарында – суретші Алмагүл Меңлібаева, «Целинный» директоры Жәмиля Нұрқалиева, әнші Бибі-Хадиша Қоңыратбай және басқалары бар.
Модельдер қолдарына кесе ұстап, дастархан жаюға көмектесіп жатқандай шықты, ал аяқтарында біздің әжелеріміз киетіндей, ішінен із киілген аяқ киім. Атмосфераның шынайы болғаны сонша, үстелге отырып, шай сұрағың келіп тұрды. Көрсетілім соңында бұл арман шындыққа айналды: сет-дизайнның бір бөлігі болған сол ұзын үстел нағыз дастарханға айналып, оның үстіне тәшкенттік дәмді тағамдар жайылды. Музыкалық сүйемелдеуді өзбек продюсері Josef Tumari жасады: пышақтың тақтайшаға тиген дыбысы, судың сылдыры, ыдыстың сыңғыры және әйелдің сөзсіз әуені – осының бәрі бірігіп, сол баяғы үй симфониясын құрды.
1 / 44
Топтаманың өзі – әрбір ортаазиялық қыздың естеліктерінен құралған пазл іспетті: құрақ техникасындағы көрпелер, шашқа арналған орамалдар, жамылғы-шәлілер, авоськалар, тіпті кекс пісіретін қалыптар. Бұл кекс қалыптары, айтпақшы, сет-дизайнның бір бөлігі еді – аналарымыз бен әжелеріміздің қамқорлығы мен мейірімді қолдарының символы. Топтамаға ойынпаздық леп берген капрон леггинстердегі және қол мен киімге жапсырылған страздар болды. Дәл осындай страздармен біз кезінде күнделіктер мен анкеталарды безендіретінбіз, ал мен мектеп кезімде олармен өзімнің қызғылт Motorola Razr телефонымды жапсырып тастадым.
Бұл топтаманың тұсауы алғаш рет біздің Алматымызда кесілгені – біз үшін үлкен мәртебе. DUNIE STUDIO кеңістігіндегі екі күндік поп-аптан кейін топтама Парижге жөнелтіледі. Құрбым: «Әрбір сәнді алматылық қыздың кем дегенде бір J.KIM лонгсливі мен Avgvst-тың ауыспалы жүзігі бар шығар», – деп қалжыңдады бұған қатысты. Шынында да, бұл брендке деген махаббат бұл қалада ерекше. Несін жасырайын, менде де айтылған нәрселердің бәрі бар.
