The Game Awards 2024: жеңімпаздар мен қызық анонстар

Видео ойындар саласындағы The Game Awards 2024 сыйлығын марапаттау рәсімі қалай өтті және онда не көрсетілді?

Лос-Анджелес қаласында оныншы мерейтойлық The Game Awards 2024 рәсімі өтті. Мұнда жыл сайын видео ойындар саласындағы жетістіктер айқындалып, көптен күткен әрі ерекше жобалардың анонсы шығады.

League of Legends үздік киберспорт ойыны, Tekken 8 үздік файтинг, Batman Arkham Shadow үздік VR/AR жобасы, Metaphor: ReFantazio үздік RPG, Balatro үздік инди ойыны, Black Myth Wukong үздік экшн атанды. Жыл ойыны мәртебесіне көпшілікке ұнамды Astro Bot ие болды. Номинациялар мен лауреаттар тізімімен мына сілтеме арқылы таныссаңыз болады.

The Game Awards 2024 рәсімінде Snoop Dogg, Twenty One Pilots және The Game Awards Orchestra музыкалық ұжымы өнер көрсетті. Сондай-ақ іс-шараға Элла Пернелл, Харрисон Форд, Аарон Пол, Кэн Кутараги, Хидео Кодзима, Khalid және басқа да танымал тұлғалар қатысты. The Game Awards 2024 барысында болған қызықтар туралы әңгімелейміз.

The Witcher 4

Польшалық CD Projekt RED студиясы Witcher 4 ойынының кинематографиялық трейлерін көрсетті. Ашық әлемге негізделген рөлдік ойынның бас кейіпкері құбыжықтарды аулаушы әрі бұған дейінгі бөлімдердің бас кейіпкері Ривиядан келген Геральттің Тағдыр сәбиі — Цири болмақ. Ақ арлан, сондай-ақ Блавикен қасапшысы атанған Геральт хикаяның жалғасында қайта оралады. Компанияның соңғы есептемесіне сенсек, ойынды әзірлеу процесі қызып келеді. Witcher әлеміндегі ең ауқымды видео ойын болмақ. Күтеміз!

ELDEN RING NIGHTREIGN

Жаңа FromSoftware ойынын ELDEN RING және Dark Souls жанкүйерлеріне жетпеген нәрсе деуге болады. Енді ойыншылар сырға толы Жераралық әлемді бірге еш шектеусіз, модификациясыз аралай алады. NIGHTREIGN атанған жобада үш адамға дейін қамтитын кооперативтік режим, жаңартылған геймплей және жаңа механика түрлері бар. Естеріңізге сала кетсек, ойын әлемін ойлап табуға «Мұз бен от әуені» кітаптар циклы мен «Тақтар таласы» сериалымен танымал америкалық жазушы Джордж Мартин атсалысқан болатын.

Thick as Thieves

Уоррен Спектр ұсынған, альтернативті 1910-шы жылдарға негізделген, бірнеше ойыншы бірден ойнай алатын стелс-экшн. Айтпақшы, Спектр — аты аңызға айналған System Shock, Deus Ex, Thief сынды иммерсивті симуляторларды жасауға атсалысқан адам. Thick as Thieves ойынында ойыншылар ұрылар рөлін сомдап, бір-бірімен жарысып, шын мәнінде «жанды» әлемнің қиындықтарына төтеп береді. Әзірлеушілер ойынның геймплейі алуан түрлі, динамикалық әрі көптеген ойын механикаларына, сынақтарға және жаңалықтарға толы болады деп сөз береді.

Фумито Уэда ұсынған, аты жоқ жоба

Фумито Уэда — атмосфера мен сырға толы Ico, Shadow of the Colossus және The Last Guardian ойындарының әзірлеушісі. The Game Awards 2024 барысында Уэда өзінің көңіл күйі жағынан өткен туындыларына ұқсас, жаңа жобасының тизерін ұсынды. Ойынның аты болмағанымен, титрлар арасынан PROJECT: ROBOT жазуын байқауға болады.

Split Fiction

Геймдизайнер Юсеф Фарес ұсынған Split Fiction — корпоративтік It Takes Two, A Way Out ойындарын әзірлеушілердің туындысы. Жаңа жоба да екі адамға арналған. Ойыншылар ғылыми-фантастика және фэнтези жанрларындағы хикаяларға қамалған жазушылар рөлін сомдайды.

BLACKFROST: The Long Dark 2

Жанр тұңғыштары Hinterland Studio ұсынған қыс мезгілінде тірі қалу симуляторының сиквелі. Ойын бірде-бір адам тұрмайтын Хармонт қалашығы мен оның айналасын қамтиды. The Long Dark 2 ойынында бірінші бөлімінде жетіспеген ортақ режим болмақ.

Borderlands 4

Gearbox Borderlands 4 ойынының кіріспе синематигі мен геймплейін қамтитын трейлерін көрсетті. Шутер-лутердің сюжеті планетаны озбыр Уақыт Сақшысының билігінен сақтауға ұмтылған төрт жаңа Қойманы Іздеушілер туралы баяндайды.

Project Century

Ryu Ga Gotoku Studio Yakuza стиліндегі жаңа, қан жосаға толы жобасын ұсынды. Ойын 1915 жылғы Жапония сеттингіне негізделмек.

Virtua Fighter

Ryu Ga Gotoku Studio SEGA-мен бірге де трейлер жариялап, елді таң қалдырды. Virtua Fighter — сериядағы жаңа ойын. Жоба жайлы ақпарат жоқ.

Mafia: The Old Country

Аты аңызға айналған Mafia сериясының приквелі туралы хабар алғаш 2024 жылдың тамызында шыққан еді. The Game Awards 2024 барысында жаңа бөлімнің кинематографиялық трейлер көрсетілді.

Dispatch

Telltale компаниясынан (The Walking Dead, The Wolf Among Us, Tales from the Borderlands) шыққан жандар әзірлеген, «интерактивті кино» элементтерін қамтитын, күлкілі видео ойын. Ойын аясында суперқаһармандар агенттігін басқаруға тура келеді. Роберт Робертсон есімді бас кейіпкердің дауысы Breaking Bad сериалында Джесси Пинкман рөлін сомдаған Аарон Полға тиесілі.

Okami sequel

Capcom компаниясы Okami ойынының сиквелі жарық көретіні туралы хабарлады. Ойында ақ арлан кейпіндегі күн патшайымы Аматэрасу рөлін сомдау қажет болады. Шығарманың қолмен салынған анимация стиліндегі бірінші бөлімі 20 жыл бұрын жарық көрген болатын.

Intergalactic: The Heretic Prophet

The Game Awards 2024 соңғы анонсы The Last of Us ойынын әзірлеушілерге тиесілі болды. Naughty Dog бұл ойынды 2020 жылдан бері жасап келе жатыр екен. Ойынның сюжеті сырлы Семпирия планетасының орбитасында қалып қалған Джордан А. Мун атты адам аулаушы туралы баяндамақ.

Темы

Жаңалықтар Ойын марапаттары Ойындар

Tatler Asia

The Game Awards 2024: Салтанатты марапат және сала жаңалықтары