«Жезтырнақ» халықаралық аренаны бағындыруды жалғастыруда
Қазақстандық Clover Street Production студиясының «Жезтырнақ» фильмі Канадада өткен The Bloody Horror International Film Festival халықаралық фестивалінің жеңімпазы атанды. Режиссер Анвар Матжановтың туындысы әлемнің түкпір-түкпірінен келген инди-авторлар мен кәсіби мамандардың жұмыстарын басып озып, Horror-Mystery Feature Film санатында бас жүлдені жеңіп алды.
«Жезтырнақ» – қазақ мифологиясына негізделген, комедия элементтері бар фолк-хоррор жанрындағы фильм. Картинаның желісі Мирас есімді қарапайым алматылық жігіт төңірегінде өрбиді. Оған ауқатты отбасынан шыққан сұлу Айна ғашық болады. Алайда бұл махаббаттың астары бар: Айна Мирастан да, оның ата-анасынан да қорқынышты құпия жасырып жүр. Ол – әдемі жас қыз кейпіндегі айлакер де қауіпті жезтырнақ.