Materialists: ромком болып көрінетін өзін-өзі қабылдау туралы драма

Люси – кинолардағы жеке тұлғама негіз болған role models-тердің жинақтама образы. Энди Андерсон сияқты ұнамды әрі ойнақы, Кэрри Брэдшоу сияқты рефлексияға жақын, сондай-ақ Андреа Сакс сияқты мансап үшін жанын беруге дайын бойжеткен. Педро Паскальдің кейіпкерімен билегеннен кейін ол былай дейді: «Келесі жігітім күйеуім болады, алайда менімен жүре бастау үшін ол өте бай болуы керек». Дакота Джонсонның сәтсіз жобаларына қатысты сынға былай алып тастасақ, оның өнері көрерменді кәдімгідей сендіреді. Бір уақытта актрисаның непотизмін ұмытып, оның балалық шағы жоқтыққа толы болғанына сене бастайсың.

Отбасылық бизнестің мұрагері Гарри, матчмейкерлер айтпақшы, нағыз «жалғыз мүйіз» мінсіз болғаны соншалық, оның шын адам екеніне сену қиынға соғады. Өзі сымбатты, өзі харизмалы, бойы ұзын әрі ақылды және де ең бастысы – бай азамат. Күйеулер нарығында теңдесі жоқ жан. Эмоция тұрғысынан ашық «мистер Биг», 10/10. «Шашыңның үлгісі күшті, киінуді де біледі екенсің», – дейді әйелдердің дейтинг тәжірибесінің ең бір қиын жағы туралы әңгіме қозғаған Люси. Алайда Люсиді ең бір таңғалдыратын жайт – Гарридің кез келген шотты төлей алуы. «Маған өзің ұнайсың ба әлде мені апаратын жерлерің ұнай ма, білмей тұрмын», – дейді Люси. Секстен кейін бірден пәтері қанша тұратынын сұрай жөнеледі.

Гарри мінсіз кандидат болып көрінгенімен, Люсидің бұрынғы жігіті – той кейтерингі қызметінде даяшы болып жұмыс істейтін 37 жастағы театр актері Джон бар. Жеке шекарадан жұрдай болған ол көршілерімен бірге пәтер жалдайды. Жинаған ақшасы – екі мың доллар ғана. Люсиге өлердей ғашық. Люси оны бірнеше жыл бұрын мерейтойларын арзан ресторанда атап өтіп, жиырма долларға бола ұрсысудан шаршап, тастап кеткен екен.

Махаббат үшбұрышы – классикалық сюжет. Materialists фильмінің дилеммасы да сол – сүйіктіңмен күркеде де тұруға бола ма, жоқ па?

МатериалисТЕР

«Мен сені кедей болғаның үшін тастадым. Осы қылығым үшін өз-өзімді жек көремін», – дейді Люси Джонға. Олар қайта қосылады. Қарым-қатынасы еш өзгермейді. Люси өзі ұмтылған жайлылыққа Джонның шамасы келмейтіні үшін өз-өзін кінәлайды.

Олар ақшаның қарым-қатынастағы рөлі туралы ойланады. Алайда өзін нашар, қатал, ақшақұмар дейтін Люси ғана. «Әйелдерге тек ақша ғана қажет» деген стереотип фильмнің орыс тіліндегі атауынан да байқалады. Түпнұсқа атау (Materialists) «Материалистка» деп өзгеріп, акцент әйелге және оның жоқтыққа көнгісіз болуына түсіп тұр.

Жай ғана ромком емес

Селин Сонның дебюті 2023 жылы Past Lives фильмімен келді. Дәл осындай күрделі қарым-қатынас туралы картина. Жаңа туындысында режиссер хикаяларды әйелдер призмасы арқылы баяндауды жалғастыра түсті. Мысалы, Люсидің клиентінің тойындағы көрініс – көп аруға таныс жағдай. «Өмірімді өз қалауымша сүре алғаныммен, тұрмыс құруға бел будым, – дейді бойжеткен. Теңдікке деген ұмтылыс жайлаған әлемде кей арулар ақ көйлек киіп, үйленгісі келгені үшін ұялатын болды.

Селин мэтчмейкингіні қарапайым бизнес түрінде көрсетеді. Фильм контексі аясында бұл шешім орынды көрінеді. Люсидің клиенті жыныстық зорлық-зомбылыққа ұшырағанда, фильмнің реңкі толықтай өзгереді. Бас кейіпкер тынымсыз бола түседі, өз-өзін кінәлай бастайды. Авторлар да мұны қалжыңға айналдырып, ситуацияны қалпына келтіруге тырыспайды. Ескі ромкомды оған тән пробемаларсыз көргендей боласың.

Болған жайт Люсиді сергітіп, оның жұмыс пен жеке өмірге деген көзқарасын өзгертеді. Ол қарым-қатынасқа математика, ал клиенттерге өсу және табыс көзі деп қарауды қояды. Фильмнің басында жұпты нақты параметрлерге сай қылып қосуға болады деп сенген мэтчмейкер махаббаттың формуласы жоқ екенін түсінеді.

Кейіпкерлердің есеюі туралы

Әйелдер бөлмесіне кірерде бір сеанстан шыққан әйелдердің әңгімесін құлағым шалып қалды. Бірі бас кейіпкердің шешіміне қарсы болса, басқасы бас кейіпкерлердің тұрмысындағы қиындықтарды айқындайтын Materialists 2 фильмі шықса деп армандап тұрды. Бірінші мәселені талқылауға болады, иә, бірақ екінші мәселе туралы айтарым – махаббат хикаялары екінші бөлімді қажет етпейді. Саусаққа қонған сақина мен жарқын болашақ туралы армандарды қамтитын финал үміт пен ертегінің шындыққа ұласуының иллюзиясын береді емес пе?