Ұлпан мен Дидар қала қарбаласынан еңбек етіп, қарапайым ғана міндеттерін орындап, әлдеқайда аз уайымдап, бір-бірін көре сала бас иіп амандасатын жандардан тұратын жергілікті комьюнитимен араласып құтылады. Алған жерлері көркем, ағашқа толы. Жолдары да, көршілері де жақсы. Нашарлау жағы – жер телімі терраса іспетті. Сондай-ақ онда үй де, коммуникация да жоқ. Ұлпан мен Дидар бір айдың ішінде жер тілімін жинастырып, кепкен бұтақтарды кесіп, ландшафт дизайнымен айналысатын сәулет өнері агенттігін жалдап, топографиялық түсірілім жасап, тоқ жүргізіп, екі күрек сындырып үлгеріпті.

Кейіпкерлеріміз саяжайға көшкісі келетіндерге оны алдымен бір жылға жалға алып көруді ұсынады. Саяжайдың берер жақсылығы көп, алайда адам ұзақ жолға, қара жұмысқа және шығынға дайын болуы керек. Арзан әрі эстетикалық және гигиеналық тұрғыдан жағымды шешім – глэмпингке бару. Саяжайда жыл он екі ай өмір сүру үшін сигнал күшейткіші, кәріз жүйесі және газ қажет.

Кейіпкерлеріміздің мінсіз саяжайы – «достар бас қосып, дастархан жаятын террасасы, сондай-ақ моншасы, от жағып, кітап оқитын аймағы бар жайлы жер, яғни a casa da minha família».

Гүлнар Наурызбай мен Әділ Әжиев

Гүлнар мен Әділ саяжайын үш жыл бұрын сатып алған екен. Оларды бұл өмір салтына бет бұруға менталдық саулыққа деген саналы көзқарас пен қала қарбаласы түрткі болған көрінеді. Қала орталығында бір шаршы метрдің құны 1 миллион теңгеден басталса, Гүлнәр мен Әділ оны 292 мың теңгеге алыпты.

Әділ қалада өскенімен, бала кезінен саяжайым болса деп армандайды екен. Гүлнар – ауылда туып-өсіп, анасымен бірге бау-бақшамен айналысқан жан. Осылайша саяжай сатып алу екеуінің ортақ арманына айналыпты. Шығын көп болса керек. Алайда жан тыныштығы – баға жетпес байлық. Үйді де өз қолымен салуына тура келді. Жер телімінде бұрынғы иесі күтіп-баптаған раушан, пион, қызғалдақ, нарцисс гүлдері өседі екен. Гүлнар олардың жанына нарғызгүл мен раушан бұталарын, сондай-ақ хоста, қоянқұлақ, және тас раушаны сынды өсімдіктерді отырғызыпты. Үш жыл бойы өсіп тұрған магнолиясын мақтан тұтады. Жұптың сүйікті жері – күрке мен гамак. Үй ішіндегі ерекше элемент – Гүлнардың бұзылған кафельден қалаған ас үй алжапқышы.

Көктемнің ортасынан күздің соңына дейін Гүлнар мен Әділ саяжайға демалыс сайын келіп тұрады. Биылғы жазда бір ай қалаға оралмауды жоспарлап отыр. Мұндағы шаруа еш бітпейді. Алайда үйдің жағдайы жақсарып келеді: жақында қабырғасы боялды, қыста Әділ мансардаға шығатын баспалдақ жасап шыққан болатын, ал Гүлнар демалыс сайын көшет отырғызады. Келесі аптада перде іліп, таңқурайды бұтап шықпақ.

Кейіпкерлеріміздің сондай-ақ Bayau.studio атты жобасы бар. Саяжай таңдап, оны жөндеуге көмектесетін бастама. Әділ – сәулетші, ал Гүлнар – идеяның авторы мен шабыт көзі. Табиғат пен сәулет өнеріне деген ортақ сүйіспеншіліктен туған отбасылық жоба. Олардың сонымен қатар «пайда көруге» деген мақсаты да бар – жас саяжайшылар комьюнитиін құру.

Анита Акишева

Анита көп жыл бойы саяжай туралы армандапты. Қала қарқынынан шаршап, өмірін сәл баяулатқысы келіпті. Өзгелер жан тыныштығын спорт, хайкинг не ретрит сынды дүниелерден іздеп жатқан кезде, Анита саяжай табады. Досы саяжайды алғашқыда жалдап, мұндай өмір салты қаншалықты жайлы болатынын байқап көруді ұсыныпты. Жалға алған саяжайы – ауданы 100 шаршы метрді құрайтын, жылыту жүйесі мен кең ауласы бар ескі үй. Саяжай иесі оның интерьері мен ауласын өзгерте беруге рұқсат еткен.  Күтімсіз қалған үйдің терезелеріне дейін сынық болған көрінеді. Мұндай жағдайдағы ең бір жеңіл шешім – достарды сенбілікке жинау. Анита үйді арт-кеңістікке айналдырып, бөлмелерін кабинет қылмақ. Онда үстел де, орындық та, мудборд салатын үлкен тақта да бар. Арт-кеңістік достар мен шығармашыл адамдар бас қосып, дәріс пен мастер-класс өткізетін орын болмақ.

Үйіне қаржы құюмен әлек болған Анита жайлылыққа әзірше бөленіп үлгермесе де, жаңа кеңістікке, оның әрбір сықыр-тықырына үйреніп келе жатыр. Беде егіп, оның көктеуін күтіп жүр. Анита есіктің алдында отырып, болашақ жөндеу жұмыстарын жоспарлағанды ұнатады. Жұмыстың көптігін аңғарғанымен, берілетін түрі жоқ, себебі Анита әр қиындықты жаңа өмір фундаментінің кірпіші деп біледі.