135 кардиналдың бәрі бірдей дауыс беруге келмейді. Кейбірі денсаулығына немесе басқа себептерге байланысты қалыс қалуы мүмкін. Папа ретінде әдетте осы кардиналдардың бірі таңдалады. Дегенмен, шіркеу ережесі бойынша, кез келген католик ер адам, тіпті конклавта жоқ қарапайым діндар да Папа бола алады (тарихта мұндай жағдайлар болған), бірақ соңғы бірнеше ғасырда тек конклав мүшелері арасынан ғана сайланып келеді.

Сайланған үміткер бұл қызметтен бас тартуға құқылы. Тарихта үш рет сондай жағдай болған. Егер жеті күн ішінде Папа сайланбаса, ереже бойынша ең көп дауыс жинаған екі үміткер ғана қатысатын жаңа кезең басталады немесе жеңіс үшін жай ғана көпшілік даусы (50% +1) жеткілікті болады.

Сайланған Папа өзіне жаңа есімді өзі таңдайды. Теориялық тұрғыдан алғанда, өз есімін де сақтап қалуына болады, бірақ бұл бұрын-соңды болмаған. Әдетте жаңа есім Папаның болашақ бағыты мен көзқарасын білдіреді. Мысалы, соңғы Папа — иезуит Хорхе Марио Бергольо өзіне Франциск есімін алды. Бұл есім қайырымдылығы, кедейшілігі мен жанашыр жүрегімен танылған Әулие Францискке сілтеме болатын.

Айта кетерлігі, шіркеу тарихында ешбір Папа «Петр» деген есімді таңдамаған. Бұл — есімі осындай алғашқы Папа, яғни Әулие Петрдің есімі. Апокрифтік наным-сенім бойынша, екінші Петр есімді Папа адамзат тарихындағы соңғы Папа болады.

Бүгінгі таңда бұл сұраққа нақты жауап жоқ. Бірақ Polymarket платформасындағы бәс тігу нәтижелеріне сүйенсек, басты фаворит — Ватикан Мемлекеттік хатшысы Пьетро Паролин. Одан кейінгі орында филиппиндік Луис Антонио Тагле мен ганалық Питер Тарксон.

Дегенмен жаңа Папаның жасы 60-тан төмен болмайтыны анық. Жас Папалар тек сериалдарда ғана болмаса (Джуд Лоу ойнаған The Young Pope), шынайы өмірде шіркеу мұндай экспериментке бармайды. Соңғы 300 жылда Папа тағына отырған кездегі орташа жас – 67 жас. Бұл папалық билікті табиғи шектеудің бір жолы деп есептеледі.