Данияр Үдербеков өзінің бірегей жобасының сырымен бөлісіп, болашаққа жоспарлары туралы ой қозғады
Алматылық дизайнер Данияр Үдербеков UDRB модульдік кроссовкасының бірегей тұжырымдамасын таныстырды. Бұл жай ғана аяқ киім емес, бұл – тұрақты дизайн мен ұзақ мерзімділікке деген жаңа көзқарас. Оның толығымен бөлшектелетін құрылымы әрбір бөлшекті оңай жөндеуге, ауыстыруға немесе қайта өңдеуге мүмкіндік беріп, бұйымның ғұмырын ұзартады.
UDRB кроссовкаларының жүрегінде – Орталық Азия мен Кавказ халықтарының ғасырлар бойы киіп келе жатқан дәстүрлі былғары аяқ киімі, мәсі жатыр. Данияр оны кездейсоқ таңдамаған: бұл аяқ киім маркетплейстерде оңай табылады, әртүрлі өлшемде шығарылады және өте практикалық болып келеді.
Нәтижесінде, заманауи технологиялар мен дәстүрлі шеберліктің үйлесімінен тұратын бірегей аяқ киім пайда болған. Ол үш элементтен тұрады: технологияның туындысы – 3D-принтерде басып шығарылған табан; дәстүрдің жалғасы – ішкі былғары мәсі-етік; және Алматы рухы – альпинизмге арналған арқаннан жасалған баулар жүйесі. Соңғысы қаламыздың асқар тауларына деген құрметті білдіреді. Оның жеңіл әрі икемді табанын жеке өлшемдерге сай реттеуге болады, ал табиғи былғарысы аяққа жайлылық сыйлап, демалуға мүмкіндік береді.
Данияр Үдербеков жақын арада жобаның өндірісі мен логистикасын жолға қойып, осы күзде Брюссельдегі көрмеде өз дизайнымен жасалған креслоны таныстырмақшы.