Tatler Lens: Мәдениеттер тоғысындағы сұлулық

Тамырың сан тарау болып, жаның үнемі екіге жарылып тұрса, өмір сүру қандай болмақ? «Бойымда Шығыстың мұңы басым ба, әлде Батыстың еркіндігі ме?» деген сауалдың жетегінде жүру...

Бұл хикаяның кейіпкері – Францияның солтүстігіндегі Гавр қаласынан шыққан Азур есімді ару. Оның анасы – француз, ал әкесі – кабулдық ауған отбасынан. Азурдың қанында бір-біріне ұқсамайтын екі әлем тоғысқан, дәл осы тоғыста нәзік әрі қайталанбас сұлулық дүниеге келді.

Кейіпкеріміздің ішкі күйін ұғыну мақсатында біз онымен бірге Париждің шығыс көшелеріне аттандық. Бұл жерде сан алуан менталитеттер, бейнелер мен хикаялар түрлі мәдениеттердің құрақ көрпесіндей, ретсіз, бірақ сонымен бірге тұтас ерекше бір ырғақ құрайды.

Алғашқы аялдамамыз – эмигранттар жолының бастауы болған символдық мәнге ие 18-ші округ болды. Одан әрі – Le Marais ауданындағы тыныштық пен жайлы атмосфераға толы ирандық шайхана. Сапарымыздың соңғы нүктесі бізді сәулетінен мавритандық сарындар аңғарылатын Археология институтына алып келді.

Әрбіріміздің жүрегімізде мың сан хикая жатыр. Дәл сол хикаялар біте қайнасып, біздің қайталанбас болмысымызды құрайды.