Ең үздік fashion-ритейлер Ssense туралы көңілсіз жаңалық
28 тамызда канадалық Ssense ритейл-платформасы CCAA заңы бойынша (бизнестің жұмысын жалғастыруға және қарыздарын қайта құрылымдауға мүмкіндік беретін америкалық Chapter 11 банкроттық процедурасының канадалық баламасы. – Tatler) несие берушілерден қорғау туралы арыз берді. Компания бұл қадамға несие берушілердің мәжбүрлі түрде сату процесін бастауға тырысқан қысымынан кейін баруға мәжбүр болған.
Ssense – Balenciaga-дан бастап, таныла қоймаған тәуелсіз дизайнерлерге дейінгі аралықтағы ең үздік сән үлгілерін ұсынатын талғампаз платформа ретінде танымал. Оның тағы бір мықты жағы – Ssense-ті жай ғана дүкен емес, сән әлеміндегі пікірталастың бағытын айқындайтын мәдени медиажобаға айналдырған аты аңызға айналған SMM-і.
2025 жылы бизнес ауыр соққыға ұшырады: АҚШ енгізген жаңа тарифтердің мөлшері 35%-ға дейін жетіп, de minimis ережесінің жойылуы (шетелден құны 800 долларға дейінгі сәлемдемелерді бажсыз әкелуге мүмкіндік беретін жеңілдік. – Tatler) компания шығындарын күрт арттырды. Сатылым 28%-ға құлдырап, көктемде компания қызметкерлерінің бір бөлігін қысқартуға мәжбүр болды. Енді Ssense тағдырын сот шешеді. Дегенмен, платформа жұмысын жалғастырып, өздері үшін әлемдік нарыққа апаратын маңызды жолбасшы болып қала беретін қызметкерлер мен дизайнерлерді қолдайтынына уәде беріп отыр.