Алматы мен Астана афишасы: шілдедегі демалысты қалай өткіземіз?

Carmina Burana балет-кантатасы, Şien электронды музыка фестивалі, Comic Con Astana, Almaty Bar Shift және тағы басқалар

Жаздың жартысы өтіп кетті деп қамығуға асықпаңыз, себебі шілде айы Алматы мен Астанада қызықты оқиғаларға толы болмақ. Дания, Германия, Ұлыбритания, БАӘ және басқа да елдерден келетін диджейлердің өнер көрсетуі, әлемнің үздік барларынан бартендерлердің қонақ кезекшіліктері, сән мен өнер туралы лекциялар, театрлық қойылымдар, жергілікті брендтердің маркеттері, голливуд актерлерімен және танымал блогерлермен фан-кездесулер, сондай-ақ ашық аспан астындағы атмосфералық фестивальдер – осының бәрі сізді күтеді.

«Әйелдер еңбегі» көрмесі

Күні: 3–10 шілде

Алматыдағы Efes Art Space арт-кеңістігі әйелдердің түрлі саладағы еңбегін лайықты бағалауға арналған көрменің өтетін алаңына айналды. Жоба әділдік пен теңдік тақырыптарын қозғап, бүкіл әлемдегі әйелдер үшін адал және тең еңбек жағдайларына қол жеткізудің маңыздылығын еске салады. Көрме кураторы – Оля Веселова.

Mama Snake қатысуымен техно-рейв

Күні: 4 шілде (Астана), 5 шілде (Алматы)

Астаналық Skvôt және алматылық Asylum клубтарында Копенгагеннен келетін диджей және Amniote Editions лейблінің негізін қалаушы Mama Snake-тің қатысуымен рейв кештер өтеді. Оның сеттері – техно, транс және эмбиент жанрларының қоспасы. Сондай-ақ, сахнада жергілікті диджейлер өнер көрсетпек: WSPCOODIE, Mark Redlights, Yankovskiy, Appolla, Tangbosh, Baell, Saida Sova, Milktea, Edigee және Zbignew.

«Каспар Хаузер және басқа да жабайы балалар» лекциясы

Күні: 5 шілде

Esentai Gallery-де суретші әрі куратор Сергей Трощенков XIX ғасырдағы жұмбақ «жабайы» жасөспірім Каспар Хаузер туралы лекция оқиды. Лекцияда оның және басқа да оқшауланған балалардың тағдыры психологияға, киноға және адам туралы қазіргі түсінікке қалай әсер еткені талқыланады.

Kerege Central Asia-дағы Pop-up market

Күні: 5 шілде

Алматыдағы Kerege арт-кеңістігінде жергілікті брендтер, дизайнерлер мен суретшілердің қатысуымен шағын маркет өтеді. Қонақтарды диджей-сеттер, интерактивтер және алкогольсіз сусындар бары күтеді.

Carmina Burana балет-кантатасы

Күні: 5 және 6 шілде

Astana Ballet театрында адам табиғаты, ішкі арпалыс пен азап туралы балет-кантатаның премьерасы өтеді. Carmina Burana – бір-біріне ғашық болған бозбала мен бойжеткеннің оқиғасы туралы қойылым. Олар бірге адамгершілігін сақтай отырып, азғырулар мен сынақтарды жеңуге және махаббаттың сырын ұғуға тырысады.

Comic Con Astana 2025

Күні: 9–13 шілде

Astana Arena және Barys Arena алаңдарында Қазақстандағы гик-мәдениеттің басты фестивалі – Comic Con Astana өтеді. Бес күн бойы қонақтарды сүйікті жұлдыздарымен фан-кездесулер мен қолтаңба-сессиялар, ойын-сауық аймақтары, мерч маркеті, косплей байқауы және тағы басқалар күтеді. Шақырылған қонақтардың қатарында – жекпе-жек өнерінің шебері Скотт Эдкинс, актерлер Энди Серкис пен Эсай Моралес, Metal Family анимациялық сериалының авторлары, косплеерлер Яя Хан мен Cinderys, блогерлер Qewbite, Marmok, Настя Джексон және басқалар бар.

Zuleikha спектаклі

Күні: 11 шілде

Almaty Theatre-да Zuleikha спектаклінің көрсетілімі өтеді. Сюжеттің ортасында – өмірінде алғаш рет бостандыққа қол жеткізіп, махаббатты сезіну үшін жер аударуды, жоғалту мен азапты бастан кешкен әйелдің тарихы. Қойылым Гүзел Яхинаның «Зулейха открывает глаза» романы бойынша сахналанған, режиссері – Әлібек Өмірбекұлы.

Almaty Bar Shift

Күні: 14–20 шілде

14 шілдеде Алматыда Almaty Tourism Bureau мен Shift Project халықаралық бастамасының бірлескен жобасы – Almaty Bar Shift басталады. Іс-шара аясында World’s 50 Best Bars, Top 500 рейтингтерінде және Michelin гидінде аталған әлемнің үздік барларының бартендерлері өткізетін шеберлік сабақтары, лекциялар және қонақ кезекшіліктері өтеді.

Qunar Ethno Fest 2025

Күні: 19 шілде

Алматы маңындағы Offtop Club демалыс аймағының аумағында көшпенділер мәдениеті рухындағы музыкалық этно-фестиваль өтеді. Бағдарламада – Steppe Sons, Ayau және Alem топтарының өнер көрсетуі, этно-ойындар, қолөнер шеберлік сабақтары, ең үздік қазақ ұлттық киіміне байқау және тағы басқалар. Сондай-ақ, фестиваль аумағында жәрмеңке және дәстүрлі қазақ тағамдары мен сусындары бар фуд-зоналар орналасады.

Moldanazar концерті

Күні: 19 шілде

Алматыдағы Motor клубында Moldanazar тобының концерті өтеді. Олармен бірге сахнаға астаналық инди-дуэт Shashoo шығады. Олардың музыкасы – инди-рок, фанк, көшпелі сарындар мен психоделиканың қосындысы.

Şien фестивалі

Күні: 19 шілде

Almaty Hills ат спорты клубының көрікті жерінде ZVUK ұжымының мультижанрлы электронды музыка фестивалі Şien өтеді. Лайн-апта – Phase Fatale (Берлиннің Berghain техно-клубының резиденті), TOCCORORO (куба-испан диджейі), Batu (Timedance лейблінің кураторы), Violet (Naive лейблінің негізін қалаушы), Kirill Zhan және Baby B (Дубайдың Secta ұжымының резиденттері), сондай-ақ жергілікті сахна өкілдері өнер көрсетеді.

«Итальяндық әйелдер стилі өнерде» арт-кеші

Күні: 24 шілде

Алматыдағы Aurora Space мәдени кеңістігінде итальян сәніне арналған арт-кеш өтеді. Өнертану профессоры Ольга Батурина сәннің қалай өзгергені, итальяндық дизайнерлердің неден шабыт алатыны және оларға кескіндеме, мүсін және сәулет өнерінің қандай әсер ететіні туралы айтып береді.

FOURE фестивалі

Күні: 24–27 шілде

Алматыдағы Horse & Polo Club ат-спорт кешенінің аумағында жыл сайынғы мультиформатты open-air FOURE фестивалі өтеді. Төрт күн бойы қонақтарды ОАР, Грузия, Үндістан, Франция, Татарстан және Өзбекстаннан келген әртістердің өнер көрсетуі, жорықтар, психология және даму туралы шеберлік сабақтары, тренингтер мен лекциялар, спорттық сабақтар, жәрмеңке, кемпинг және тағы басқалар күтеді.

Темы

Алматы Астана Афиша