Әнші Дуа Липа ұсынған кітаптар топтамасы

Әншінің кітап клубынан ең қызықты туындылар топтамасы

Жарнамаға түсіп, концерттік турда өнер көрсетіп, яхтада демалып, Каллум Тернермен болатын үйлену тойына дайындалып жүрген Дуа Липаның бір минут бос уақыты жоқ сияқты. Осындай тығыз кестемен ол айына бір кітап оқуға қалай уақыт табады деп таңғаласың. Әнші оқыған кітаптары туралы ойларымен өзінің Service95 атты кітап клубының Instagram-парақшасында бөліседі. Ол жерде заманауи әдебиетті авторлардың өздерімен талқылайды. Дуа бұл кітап клубын 2023 жылы ашып, кейін оны керемет орындар, рецептер мен сән әлемінің жаңалықтарымен бөлісетін тұтас бір медиа кеңістікке айналдырды. Қазір оның кітапқа қатысты бұл қызметін 450 мыңнан астам адам бақылайды.

Жақында Pinterest Дуа Липаның кітап клубымен бірлесіп, оның ұсыныстарынан тұратын арнайы тақта жасады. Бұл топтамада танымдық әдебиеттен бастап, романдар, эпистолярлық жанр, мемуарлар және тағы басқа да туындыларды табуға болады. Біз сіздер үшін заманауи it-girl оқыған ең қызықты кітаптарды жинадық.

«Just Kids»

Авторы: Патти Смит

«Паттиді бір сөзбен сипаттау қиын – ол әнші, ақын, суретші және, әрине, жазушы. Бір нәрсені сеніммен айтуға болады – бұл кітапта ол өзінің болмысының әрбір қырын көрсете білген», – дейді Дуа Липа. Кітапта Патти оқиғаны өз атынан баяндап, есею және шығармашылық тұрғыдан қалыптасу жолын сипаттайды. Ол өз шығармасында 1960-жылдардың соңы мен 1970-жылдардың басындағы Нью-Йорк атмосферасын дәл суреттейді.

IMAGE Pinterest X Dua Lipa

Pinterest X Dua Lipa

1 / 1

«Араның шағуы» (Bee Sting)

Авторы: Пол Мюррей

«Араның шағуы» кітабында қаржылық және эмоциялық дағдарысты бастан кешіп жатқан Барнстар отбасының оқиғасы баяндалады. «Бұл – сюжеттік шиеленісті қалай құру керектігінің нағыз шеберлік сабағы. Шекспир шығармаларындағыдай түсініспеушілік қарапайым адамдардың өмірін қателіктер тізбегіне айналдырып, ақыры қоғамнан да, бір-бірінен де алшақтауға мәжбүр етеді», – деп романның идеясын дөп басады Дуа.

IMAGE Pinterest X Dua Lipa

Pinterest X Dua Lipa

1 / 1

«Веди свой плуг по костям мертвецов»

Авторы: Ольга Токарчук

Поляк жазушысы – 2018 жылғы Халықаралық Букер сыйлығының және 2019 жылғы Әдебиет саласындағы Нобель сыйлығының лауреаты. «Веди свой плуг...» кітабында ол адам жанының қалтарыстарын зерттейді. Дуа Липа бұл туындыны «күреске шақырған үндеу, астрология туралы сюрреалистік ойлармен безендірілген философиялық зерттеу және оқығанда қаныңды қыздырып, жүрегіңді елжірететін оқиға» деп сипаттайды.

IMAGE Pinterest X Dua Lipa

Pinterest X Dua Lipa

1 / 1

«Қонақ қыз» (The Guest)

Авторы: Эмма Клайн

«Алекс деген кім өзі – эскорт қызметін көрсететін қыз ба, ұры ма, әлде жай ғана өмір сүру үшін күресіп жүрген әйел ме?» – деп, әнші шығарманың негізгі идеясын жеткізеді. «Қонақ қыз» – сырт қарағанда гламурлы роман болып көрінгенімен, іс жүзінде таптық ерекшелік, артықшылықтар және қауіпсіздікке ұмтылу сияқты маңызды мәселелерді көтереді.

IMAGE Pinterest X Dua Lipa

Pinterest X Dua Lipa

1 / 1

«Still Born»

Авторы: Гуадалупе Неттель

Мексикалық жазушының бұл романы 2020 жылы жарық көрген. Туынды әлі орыс тіліне аударыла қойған жоқ. Оның ағылшынша аудармасы Халықаралық Букер сыйлығының шорт-листіне енген. Роман көптеген әйелді толғандыратын «Өмірге сәби әкелу керек пе, жоқ па?» деген сауалдың төңірегінде өрбиді. Дуа бұл оқиғаның жанды тебірентетінін жазады: «Өтінемін, оны өз қарқыныңызбен оқыңыз. Бұл кітап мені шынымен жақсы көретін адамыңа қамқор болудың қандай бақыт әрі мәртебе екені туралы ойландырды».

IMAGE Pinterest X Dua Lipa

Pinterest X Dua Lipa

1 / 1

«Say Nothing: A True Story of Murder and Memory in Northern Ireland»

Авторы Патрик Радден Киф

Дуа Липа Радден Кифтің жұмысын мінсіз танымдық-көркем роман жазудың шеберлік сабағы деп атады. Америкалық журналист өз кітабында ағылшын-ирланд қақтығысын зерттеп, бостандықтың құны туралы ойлануға жетелейді.

IMAGE Pinterest X Dua Lipa

Pinterest X Dua Lipa

1 / 1

«Қайғы – қауырсынды нәрсе» (Grief Is the Thing with Feathers)

Авторы: Макс Портер

«Кейде әлемге деген көзқарасыңды түбегейлі өзгертетін кітаптар кездеседі. Макс Портердің дебюттік романы – сондай туынды. Ол сюжет құрудың барлық ережесін бұзып, жабайы, толқытатын әрі тамаша дүние жасайды», – деп тебіренеді әнші. Бұл – әйелінің өлімінен кейін екі баласын тәрбиелеп отырған суретші туралы оқиға. Оған қайғымен күресуге өзінің картиналарынан тіріліп шыққан қарға көмектеседі. Қазір Ұлыбританияда романның экранизациясы қолға алынған. Бенедикт Камбербэтч басты рөлді сомдайтын фильм 2025 жылдың қарашасында шықпақ.

IMAGE Pinterest X Dua Lipa

Pinterest X Dua Lipa

1 / 1

«On Earth We're Briefly Gorgeous»

Авторы: Оушен Вуонг

Ақын Оушен Вуонг өзінің дебюттік романында Вьетнам соғысының сұмдығына тап болған отбасының оқиғасын баяндайды. Басты кейіпкер сауатсыз анасына хат жазып, өзінің вьетнам-американдық балалық шағын еске алады. «Бұл кітап мені атауымен-ақ баурап алды. Ал кейін автордың романның әрбір бетінде билеп тұрғандай поэтикалық тілі таңғалдырды», – деп бөлісті Дуа Липа.

IMAGE Pinterest X Dua Lipa

Pinterest X Dua Lipa

1 / 1

«Сенім» (Trust)

Авторы: Эрнан Диаз

Уолл-стрит магнаты туралы оқиғаны бірнеше адам баяндайды. Оқырманның алдында кімге сену керектігі туралы таңдау тұрады: миллионерге ме, оның әйеліне ме, әлде кездейсоқ жолаушыға ма? Дуа Липа бұл кітаптан тіпті «басының айналғанын» мойындады.

IMAGE Pinterest X Dua Lipa

Pinterest X Dua Lipa

1 / 1

«There There»

Авторы: Томми Ориндж

Американың он екі түпкілікті тұрғынының үлкен қалалардағы оқиғасын Дуа Липа қысқа әрі нұсқа сипаттады: «Кітаптың кіріспесінде автор Американың түпкілікті тұрғындары туралы 400 жылдық жала мен стереотиптерді қысқа да нұсқа жоққа шығарады. Бұл он бетті оқу жүрекке ауыр тиеді, алайда қарапайым адамдардың күрделі өмірін шынайы түсіну үшін бұл – оқылуы тиіс маңызды кіріспе».