Ayau-дың жаңа келбеті: әншімен үлкен сұхбат

Талғамсыз музыка

Адамдардың неге өнерді салыстыратынын әлі күнге дейін түсінбеймін. Музыка – жарыс емес, онда бағалаудың қасаң қағидалары жоқ, әркімнің өз көзқарасы, өз талғамы бар. Әркім өзі қалаған нәрсесі туралы жазады, ішкі жан дүниесін сыртқа шығарады. Әрине, бірдеңені жақсы, бірдеңені жаман деуіміз мүмкін, бірақ бұл тек жеке талғамға байланысты. Егер маған бірдеңе ұнамаса, мен оны талдап, сынауға асықпаймын, жай ғана айналып өтемін.

Армандар мен ақша

Менің басты мұратым – адамдарға менің музыкам арқылы өздерін табуға мүмкіндік беру. Менің ойымша, өнерді әртістен бөліп қарауға болмайды, сондықтан мені автор ретінде танығаны маңызды. sybyrlaiyn <3 трегін шығарғанда, мені ешкім танымайтын, сол кезде қатты алаңдадым. Мен жай ғана музыка жазып, ойларыммен бөліскім келді. Ақша, атақ туралы ой мүлде болған жоқ. Ақшаның, әрине, орны бар, бұл – бизнес. Бірақ мен үшін шығармашылық әлдеқайда биік. Егер бұл салаға бастапқыда тек ақша табу үшін келсең, ештеңе шықпайды.

TikTok-қа арналған музыка

Адамдар әрқашан жасандылықты сезеді, шынайылықты да бірден аңғарады. Сондықтан әлеуметтік желілерге арнайы трек жазудың қажетін көрмеймін. TikTok-та көбіне махаббат туралы мұңлы әуендер тез тарайтын сияқты. Сондықтан менің basqany :( сияқты әндерім сол платформаға сәйкес келеді. Бұл трек әр күз сайын қайта жанданады, себебі бұл уақытта адамдар мұңайып, сырласқысы келеді.

Мен әзірге биге арналған көңілді тректерді қалай таныту керектігін толық түсінбеймін. Корея әртістерінің видеоларын қарап, сол стратегияны үйренуге тырысамын. Дәл k-pop әртістері өз шығармашылығын ілгерілетуге ерекше көңіл бөледі. Ал американдықтар, мысалы, жай ғана ән шығарады, сол жеткілікті. TikTok-тағы билер мен трендтерді олар үшін тыңдармандардың өздері ойлап табады.

Түн

Әдетте мен түнде, бәрі ұйқыға кетіп, айнала тынышталғанда, ештеңе мазаламайтын кезде жазамын. Менің әбден шаршаған даусым сол сәтте таңқаларлықтай әдемі әрі нәзік естіледі. Диктофонды қосып, пернетақтада аккордтарды тере бастаймын. Мәтін де, әуен де сол сәтте туады. Кейде түсініксіз сөздерді ыңылдап, әуенін шығарып аламын да, мәтінін кейін жазамын. Мұның кәсіби тілде «бұлбұл тілі» деген атауы бар. Мысалы, basqany :( трегін жазғанда, менің ойымда тек әннің атауы ғана болды, басқа ештеңе жоқ.

Бұл істе маған көбіне телефондағы «жазбалар» қосымшасы көмектеседі. Күн бойы келген жаңа идеяларды үнемі сонда түртіп қоямын. Олар теңіздей жиналып қалды, телефонда жад та жетпейді. Ол жерде, сірә, екі альбомға жететін дүние бар. Оның көбі, әрине, жарық көрмейді, бірақ мен әрдайым ескі жазбаларға оралып, бірдеңені пысықтап, өзгертуге тырысамын.

Өзгерістер

Кейде маған мүлде ұқсамайтын әндер шығады. Айталық, jaman adam? трегіндегі өз даусымды жатырқаймын. sensiz? әнін мен 16 жасымда жаздым, қазір ол ән тым балалық болып көрінеді. Мен өсіп келемін, талғамдарым да өзгеруде. Шамасы, сол кезде бұл әндерді дәл солай сезінген болармын. Менің қандай да бір нақты образым жоқ. Мен 19 жасымдағыдай ашық, көңілді әрі сәл аңғал болып қала беремін. Кейбір сезімдер мен құндылықтар, әрине, өзгереді, бірақ мұның бәрі шынайы, жасандылықсыз.

Қазір мен өзім туралы, қандай керемет екенім туралы жазып жүрмін. Әрине, қалжыңдаймын! Бостандық туралы, өзіңді қабылдау туралы жазамын, махаббат туралы да ән айтуды жалғастырамын. Бұрын махаббатты тым ертегідей қабылдайтынмын. Әлемдегі барлық нәрсе, әсіресе махаббат, керемет деп ойлайтынмын. Кейін олай емес екенін түсіндім. Мәтіндерім де өзгерді: егер бұрын бәрі нәзік болса, қазір KET трегіндегідей, «өз даусым», өз мінезім пайда бола бастады. Көпшілік бұл ән арқылы мен өз ішкі уайымымды сыртқа шығардым деп ойлады. Анам алғаш рет әнді естігенде, қатты уайымдап қалды. Шын мәнінде, мен жай ғана құрбымның оқиғасынан шабыттандым.

Стиль тұрғысынан трендтерге сүйенемін. Қазір нөлдік жылдар мен Y2K стилімен белсенді түрде «ойнап» жүрмін. Әсіресе Белла Хадидтің киінгені ұнайды. Бұрын тек оверсайз киетінмін, қазір біртіндеп денемді қабылдап, нәзік бола бастадым.

Шетелдік тыңдарман

Жаңа тілдер жаңа аудиторияға жол ашатынын түсінемін. Бірақ орыс тілінде жаза бастайтыныма күмәнім бар. Ал ағылшын тілінде міндетті түрде туынды болады. Күз мезгілінде қазақ және ағылшын тілдерінде жазылған сингл шығуы мүмкін. Менің музыкамды шетелде де тыңдайды, сондықтан ағылшын тіліндегі ән – өте қисынды қадам. Бірақ қазақ тілі – менің жанымның тілі. Тек ана тілімде ғана мен сезімдерімнің ең нәзік қылдарын шерте аламын. Мен бала кезімнен қазақша сөйлеймін. Қазір үйде орысшаға көшсем, әкем кейде ескерту жасап тастайды.

Мұңлы әуендер

Маған жай ғана сабырлы, сәл мұңға толы музыка ұнайды. Мен табиғатымнан қайғырғанды ұнатпаймын, бірақ осындай кезеңдерде музыка ерекше шынайы шығады. Мысалы, basqany :( трегін ерекше ауыр кезеңде жаздым, сондықтан бұл әнді ерекше жақсы көремін. Мен эмпатпын, және бұл қасиетім ешқайда кетпейтін шығар. Ал егер кетіп қалса – кетсін. Есесіне, жүйкем тыныш болады.

CD: Сергей Юн
Продюсер: Айгерім Таңатар
Фотосуретші: Аружан Жанова
Оператор: Тимур Өмірәлиев
Стилист: Зарина Файздрахманова
Визажист: Карина Бабеджанова
Шаш стилисі: Самал Сариева
Сет-дизайнер: Әсем Макина
Сет-дизайнердің көмекшісі: Эля Томсон
Зергерлік бұйымдар: Pasquale Bruni
Киім бренді: TRAIPSE OF TRIUMPH