Йинка Шонибаренің «Жел мүсіні (ТП) II» туындысы Almaty Museum of Arts үшін арнайы жасалған
Almaty Museum of Arts ғимаратының бас кіреберісінің алдына британиялық-нигериялық суретші Йинка Шонибаренің «Жел мүсіні (ТП) II» атты туындысы орнатылды. Оның пішіні көптеген ғасырлар бойы Атлант мұхиты арқылы құлдарды тасымалдау үшін қолданылған кеменің желкендерін еске салады. Ауыр алюминийден құйылғанымен, оны желдің өзі әлдилеп, қалыптастырғандай жеңіл әрі әуеде қалықтап тұрғандай әсер қалдырады. Шонибаре табиғаттың тылсым күйін бейнелей отырып, «жоқтан бар болған мүсін» жасағысы келген. Ол бұл мақсатына жету үшін өз шеберханасында матаға фен арқылы ауа ағынын бағыттап, көптеген тәжірибе жасаған.
«Жел мүсіні (ТП) II» «батик» немесе «голланд балауызы» ретінде де танымал Ankara матасын еске салатын ерекше өрнектерімен назар аудартады. Бұл материал Африкамен тығыз байланысты болғанымен, оның тарихы әлдеқайда күрделі. Бастапқыда матаны Индонезияда ойлап тапқан, кейінірек оны дайындау технологиясын голландтар меңгеріп, жаппай өндіріске қойып, Азияға қайта сатуды жоспарлаған. Дегенмен, мата Азияда танымал бола алмады, есесіне Батыс Африка халқының жүрегінен терең орын алды. 1950-1960 жылдардағы тәуелсіздік үшін күрес кезінде бұл мата ұлттық бірегейлік пен отаршылдарға қарсылықтың символына айналды. Оның тарихы – түрлі мәдениеттердің қалай тоғысып, біте қайнасатынының жарқын мысалы. Йинка Шонибаре өз шығармашылығында осы мәдениеттер диалогы идеясын шебер жеткізіп, отаршылдық пен бірегейлік тақырыптарын зерттейді.
Almaty Museum of Arts
1 / 1