Жасөспірім кезінде Нью-Йоркке көшіп барып, жергілікті скейтерлер ортасына қосылады. Сол жерде фотограф Ларри Кларкпен танысып, оның Kids (1995) фильміне сценарий жазуға мүмкіндік алады. Бұл Хармонидің үлкен өнер әлеміне алғашқы қадамы болатын. Режиссер ретіндегі алғашқы Gummo туындысы оның басты шығармасына айналды. Бұл фильм оған бірден танымалдық алып келді, бірақ күндердің бір күні есірткіге тәуелдікке де алып келді. Сонан соң Хлоя Севиньи одан кетіп қалды, көп ұзамай екі үйі өртке оранды. Бірде Мерил Стриптің сөмкесін ақтарып отырған жерінен ұсталып, әйгілі Леттерман шоуының «қара тізіміне» ілікті. 

Шымаудан шығуға тырысқан ол алдымен Лондонға, кейін Парижге көшіп кетеді. Бірақ бұл қадамдарынан түк шықпайды. Кейін ол түбегейлі емделіп, өзіне келу керек екенін түсінеді. Сол сәтте дизайнер Аньес Трубле мен сиқыршы Дэвид Блейн жанынан табылды. Олар Хармониге жанашыр дос ретінде қолдау білдірді. Осылайша ол өмірге қайта келіп, шын сүйген адамымен отбасын құрып, үш баланың әкесі атанып, жаңа туындылар дайындауды қолға алды.

Режиссердің қолтаңбасы

Кориннің фильмі құрылымсыз, кейде тіпті бейберекет көрінуі мүмкін. Бірақ бұл – оның қолтаңбасы. Ол нақты оқиғадан бұрын көрініс, көңіл күй, ерекше кейіпкерлер арқылы әсер беруді қалайды. Ет пен спагетти сияқты күнделікті заттардың өзі – оған киноға тұрарлық тақырып. Оның режиссерлік стиліне скейт-видеолар үлкен ықпал еткен, әсіресе Alien Workshop-тың Memory Screen атты алғашқы бейнежазбасын атап көрсетуге болады. Мұнда скейт трюктерімен қатар артық ештеңесіз, шынайы тұрмысты бейнелейтін кадрлар, андеграунд музыка, өзіндік стиль бар. Сол стиль Хармониге жақын.

Корин TikTok-пен де параллель жасайды. Бұл платформаны ол заманауи эстетика мен эмоцияны жеткізудің ерекше түрі деп санайды. Қысқа бейнелер, жылдам ауысым, эмоцияға құрылған контент – бәрі де оның фильмдеріне ұқсас.

Хармони Кориннің шығармалары бүгінгі жастар мәдениетін, азғындықты, еркіндікті, шекарасыз өмір салтын дәл әрі шынайы береді. Оның кейіпкерлері – көбіне қоғамнан тыс қалған жандар: скейтерлер, бұзақылар, панк-эстетикадағы тұлғалар. Режиссер олардың өмірі мен құндылықтарын жасандылықсыз бейнелейді. Хармонидің пайымынша, шын режиссер болу үшін өмірде өзің де күйіп-пісіп жетілуің керек: «банк тонап, түрмеде отырып шықсаң ғана, көрерменге айтар ойың, баяндар дүниең болады», – дейді ол. Сол себепті де ол үнемі жаңа тәсілдер іздейді, ешкімге ұқсамайтын өз стилін қалыптастырып, шын мәнінде ерекше дүние жасауды жөн көреді.

Рөлдерді Хармони Корин өз жобаларында көбіне кәсіби емес актерлерге немесе таныстарына береді. Алайда оның фильмдерінде Джеймс Франко, Мэттью Макконахи, Трэвис Скотт, Гуччи Мейн, Селена Гомес, Снуп Догг сияқты жұлдыздар да бой көрсеткен. Қызығы, Корин жазған сценарий бойынша түсірілген Kids (1995) фильмін түсіру кезінде жасөспірімдер оның көркем фильм боларын мүлде білмеген. Олар өздерін деректі фильмге түсіріп жатыр деп ойлаған.

Хармони Кориннің жаңа дәуірі

«Aggrō Dr1ft» пен «The Invas1on of the Baby Drones» – режиссердің соңғы картиналары. Біріншісінің сюжеті жойқын қылмыстық кейіпкерді жою тапсырылған жалдамалы өлтіруші жайлы. Екіншісі – сәби жүзді ұрылардың байларға тиесілі зәулім үйлерге басып кіріп, тонауға түсу туралы оқиға. «Aggrō Dr1ft» толықтай инфрақызыл түсіріліммен жасалған. Ал «The Invas1on of the Baby Drones» – ультрареалистік, бірінші жақтан баяндайтын онлайн-шутер түрінде түсірілген. Екі фильмде де Корин жасанды интеллект мүмкіндіктерін кеңінен пайдаланып, тек ЖИ контентке тән «жеркенішті сұлулық» эстетикасына қол жеткізген.

Кейбіреулер бұл туындыларды бірегей кинотәжірибе десе, енді бірі оларды шын мәніндегі «br*inrot» деп бағалайды. Екеуі де шындықтан алыс емес. Бұрын Корин жастық шақты кештер, жыныстық қатынас, есірткі, бейберекет жүріс-тұрыс арқылы сипаттаса, қазір оның кейіпкерлері – әлеуметтік желілер, бейне ойындар, стримингілер, мемдер, технология мен жасанды интеллектіге қызығатын ұрпақ. Қосынды өзгермеген, тек қосылғыштары ауысқан.

Қазір Хармони Коринді киноға қарағанда бейне ойындар көбірек қызықтырады. Бір сұхбатында ол соңғы Call of Duty трейлерлері Спилбергтің бүкіл фильмдерінен гөрі мықтырақ көрінеді деп мәлімдесе, тағы бірінде стример IShowSpeed-ті «жаңа Андрей Тарковский» деп атаған. Режиссердің айтуынша, таяуда бейне ойындар ең басты өнер түріне айналып, кино әлемімен біте-қайнасып кетуі бек мүмкін. Бұл құбылысты оның өзі де, командасы да «blinx» деп атайды.

Корин қазіргі кезде жобаларын 2023 жылы өзі негізін қалаған EDGLRD шығармашылық бірлестігімен бірге жүзеге асырып жүр. Ол бұл ұжымға тек жаңаша ойлайтын, ерекше көзқарасы бар жастарды тартады. Мәселен, i-D Magazine үшін IShowSpeed-пен жасалған түсірілімде ол Медет Шаяхметовпен бірлесіп жұмыс істеген. EDGLRD портфолиосына COMME des GARÇONS, SKIMS, Nike жарнамалық кампаниялары, SSENSE платформасына The Weeknd-тің виртуалды сыңарымен сұхбат, Yung Lean, Bladee, AraabMuzik, BLP Kosher және Хармонидің өзі қатысқан Boiler Room DJ-сеттері, TAMASHIKA бейне ойыны және тағы басқа жобалар кіреді. Сондай-ақ EDGLRD өз скейтбордтары мен командасы бар скейт-бренд ретінде де танымал. Топтың алдағы релиздерінің бірі – JACKBOYS 2 фильмі. Ол Трэвис Скотт пен JackBoys рэп тобының жаңа альбомымен қатар шығады.

Хармони Кориннің шығармашылығы біреуге тым жасанды, ал біреуге шынымен «миды шірітетін» контент болып көрінуі мүмкін. Бірақ бұл – режиссердің өз мақсатына жеткенінің дәлелі. Ол бүгінгі күннің шындығын, үрейі мен сұлулығын дәл сезініп, жас таланттарды таба отырып, жаңа идеяларды батыл жүзеге асырады. Ол ескі мектептің әдістеріне жабыспайды, заманауи трендтер мен технологиялардан үркімейді. Сол себепті де Корин қашан да заман ағынынан қалыспайды.